Qazaqstanda dáriger tapshylyǵy 20 paıyzǵa azaıdy – DSM ókili

Onyń sózinshe, aýyldyq jerlerge jumysqa baratyn dárigerlerge birqatar áleýmettik qoldaý kórsetiledi.

– Aýyldyq jerge baryp jumys isteıtin dárigerlerge kóterme aqy, úımen qamtamasyz etý, balalaryn mektepke deıingi uıymdarǵa konkýrcsyz ornalastyrý sııaqty sharalar atqarylady. Byltyrdyń ózinde 1760 medıtsına qyzmetkeri osylaı aýyldyq óńirge baryp, áleýmettik qoldaý aldy. Olardyń 700-den astamy úıli boldy. Al taǵy bir aıta ketetini: 2024 jyly asa tapshy sala mamandaryna 100 eń tómengi jalaqy mólsherinde áleýmettik qoldaý kórsetilgen bolatyn, – dedi Baǵjan Muhametbek.

Mınıstrlik ókili aýyldyq jerlerge asa qajetti mamandardy tartý jumystary jalǵasyp jatqanyn atap ótti.

– Qazirgi tańda dárigerler aýyldyq jerlerge baryp, qyzmet kórsetip, osyndaı qoldaý sharalaryn alyp jatyr. Kardıolog, hırýrg syndy asa qajetti tájirıbeli mamandar, aýylǵa baryp medıtsınalyq kómekti kórsetedi ári 5 jyl boıy sol óńirde jumys isteıdi, – dedi ol.

Suhbat barysynda medıtsına qyzmetkerleriniń qaýipsizdigin qamtamasyz etý máselesi de kóterildi.

– Ózderińiz biletindeı, sońǵy jyldary medıtsınalyq qyzmetkerlerge kúsh kórsetý jaǵdaılary jıilep ketken edi. Sondyqtan Memleket basshysynyń tapsyrmasymen arnaıy zań bekitildi. Qazirgi tańda sol zań boıynsha medıtsına, jedel járdem qyzmetkerlerin qoldaý men qorǵaý sharalary júrgizilip jatyr, – dedi Baǵjan Muhametbek.

Onyń aıtýynsha, dárigerler úshin turǵyn úı alýdyń birneshe múmkindigi qarastyrylǵan.

– Medıtsına qyzmetkerleri «Dıplommen – aýylǵa» baǵdarlamasy arqyly aýyldyq óńirge baryp qyzmet etse, tómengi paıyzben úı alýǵa múmkindigi bar. Ári úıdi ózi qalaǵan jerden ala alady. Odan bólek, ákimdikter men «Otbasy bank» birlesip medıtsına qyzmetkerlerine arnaıy baǵdarlamalar usynady — sol arqyly da úı alýǵa bolady, – dedi ol.

Spıkerdiń málimetinshe, áleýmettik qoldaý sharalary jas mamandarǵa da qoljetimdi.

– Bul áleýmettik qoldaýdy jas mamandar da ala alady. Byltyr úıli bolǵan 1760 medıtsına qyzmetkeriniń 500-i – joǵary oqý ornyn jańa bitirgen jas mamandar. Odan bólek, aýylǵa qyzmet etýge barǵan medıtsına salasynyń mamandaryna tájirıbesi mol, osy salada biraz jyldan beri jumys istep kele jatqan maman tálimger retinde bekitiledi. Ol óziniń tájirıbesimen bólisip, jas mamandardy salaǵa beıimdeıdi, – dedi Baǵjan Muhametbek.

Mınıstrlik ókili elimizdegi kadrlyq ahýalǵa da toqtaldy.

– Qazirgi tańda medıtsına salasynda 280 000-nan astam maman qyzmet etedi. Onyń 84 000-y – dárigerler, qalǵany – osy salada qyzmet etip júrgen orta medıtsına qyzmetkerleri. 2023 jylmen salystyrǵanda qazirgi tańda dáriger tapshylyǵy 20 paıyzǵa tómendegen. Biraq kadr únemi aınalymda bolady: qazirgi tańda dáriger tapshylyǵy 3869 shtattyq birlik, – dedi ol.

Baǵjan Muhametbektiń aıtýynsha, elde suranys joǵary medıtsınalyq mamandyqtar da bar.

– Asa tapshy mamandarǵa jalpy medıtsına dárigerleri, terapevter, kardıologtar men hırýrgtar, sondaı-aq sáýleli dıagnostıka qyzmetkerleri men anestezıolog-reanımatologtar jatady – bulardyń bári bizge eń qajetti mamandyqtar bolyp sanalady, – dedi ol.

Sonymen qatar ol óńirlerdegi kadr tapshylyǵy máselesine toqtaldy.

– Al óńirlerge keletin bolsaq, Almaty, Soltústik Qazaqstan jáne Aqmola oblystarynda dáriger tapshylyǵy asa joǵary. Biraq qazir bul óńirlerde dárigerlerdi keshendi qoldaý jumystary júrgizilip jatyr jáne ári qaraı da jalǵasa beredi, – dedi mınıstrlik ókili.

Suhbat barysynda medıtsına qyzmetkerleriniń saladan ketý kórsetkishteri de sóz boldy.

– Syrtqy mıgratsııany qaraıtyn bolsaq, bizdiń dárigerlerimizdiń sońǵy 2-3 jylda júıeden ketý kórsetkishi 5 esege azaıdy. Byltyr júıeden 150-180 shamasynda medıtsına qyzmetkeri ketken, al buǵan deıin bul san 900-ge deıin jetetin edi. Demek, qazirgi tańda medıtsına qyzmetkerleri osy salada qalyp, jumys isteýdi sheship otyr, – dedi Baǵjan Muhametbek.

Eske sala keteıik, eldegi medıtsına uıymdarynda 45 myńnan astam bos oryn bar.