Qazaqstanda dáriger-ınternniń mártebesi zańmen bekitiledi
ASTANA. KAZINFORM – Densaýlyq saqtaý mınıstrligi medıtsına kadrlaryn daıarlaıtyn klınıka bazalarynyń, ýnıversıtet aýrýhanalarynyń, rezıdentýra bazalarynyń jáne densaýlyq saqtaý salasyndaǵy bilim berý uıymdary klınıkalarynyń qyzmetin retteıtin qaǵıdalarǵa ózgerister engizý týraly buıryq jobasyn ázirledi.
Qujatta dárigerlerdi daıarlaý júıesin jetildirýge baǵyttalǵan birqatar jańa norma kózdelgen. Atap aıtqanda, «dáriger-ıntern» uǵymyn resmı túrde bekitý, sondaı-aq jas mamandardyń praktıkalyq daıarlyqtan ótýine qolaıly jaǵdaı jasaý usynylady.
– Eń basty jańalyqtyń biri – «dáriger-ıntern» uǵymyn resmı túrde engizý. Bul medıtsınalyq joǵary oqý ornyn támamdaǵannan keıin tájirıbeli dárigerlerdiń jetekshiligimen kásibı daıarlyqtan ótip, praktıkalyq daǵdysyn jetildiretin mamannyń quqyqtyq mártebesin aıqyndaýǵa múmkindik beredi, - delingen zań jobasynda.
Sondaı-aq qujatta klınıkalyq bazalar men ýnıversıtet aýrýhanalarynda oqý úderisin jetildirýge jaǵdaı jasaý qarastyrylǵan. Bul bolashaq dárigerlerdiń sapaly tájirıbeden ótýine múmkindik berip, kórsetiletin medıtsınalyq kómektiń qaýipsizdigi men sapasyn arttyrýǵa baǵyttalyp otyr.
Mınıstrliktiń málimetinshe, dáriger-ınternder men rezıdentterdiń emdeý úderisine qatysýy qoldanystaǵy talaptarǵa sáıkes jáne bilikti mamandardyń baqylaýymen júzege asyrylmaq.
Vedomstvo praktıkalyq tájirıbe jınaqtaý dárigerlerdi daıarlaýdyń mańyzdy bóligi ekenin jáne halyqaralyq tájirıbege saı keletinin atap ótti. Buıryq jobasy qabyldansa, medıtsına kadrlaryn daıarlaý júıesin jetildirýge, bilim berý uıymdary men medıtsınalyq mekemelerdiń ózara baılanysyn nyǵaıtýǵa jáne jas dárigerlerdiń kásibı qalyptasýyna qolaıly jaǵdaı jasaýǵa yqpal etedi.
Qujat 27 shildege deıin qoǵamdyq talqylaý úshin «Ashyq NQA» portalynda jarııalandy.
Buǵan deıin Densaýlyq saqtaý mınıstrligi kórsetiletin medıtsınalyq qyzmetterdiń jarnamasyn júzege asyrý qaǵıdalaryna ózgertýler engizetini jóninde jazdyq.
