Elimizde dári óndirisi úsh jylda 37% ósti
ASTANA. KAZINFORM — Qazaqstanda otandyq farmatsevtıka óndirisiniń kólemi keıingi úsh jylda 37% artyp, 191 mlrd teńgege jetti. Óndiristiń ósýi 2026 jyly da jalǵasyp jatyr.
Úkimettiń baspasóz qyzmetiniń habarlaýynsha, osy jyldyń alǵashqy alty aıynda dárilik zattar men medıtsınalyq buıymdar óndirisiniń kólemi 126,6 mlrd teńge boldy. Bul byltyrǵy osy kezeńmen salystyrǵanda 30% kóp.
Qazir Qazaqstanda farmatsevtıkalyq jáne medıtsınalyq ónim shyǵaratyn 209 kásiporyn jumys isteıdi. Onyń 43-i dári-dármek óndiredi. Tamyz aıyndaǵy málimet boıynsha, naryqtaǵy otandyq ónimniń zattaı úlesi 40,3%-ǵa jetken.
Qazaqstandyq kompanııalar dárilik zattar men medıtsınalyq buıymdardyń 2 994 ataýyn tirkegen. Olardyń qatarynda bakterııaǵa qarsy, júrek-qan tamyrlary aýrýlaryna arnalǵan, aýyrsynýdy basatyn jáne qabynýǵa qarsy preparattar, sondaı-aq ortalyq júıke júıesi aýrýlaryn emdeýge arnalǵan dáriler bar.
Otandyq óndirýshiler úshin uzaq merzimdi satyp alý tetigi de engizilip jatyr.
— 2026 jyldyń basyndaǵy málimet boıynsha, 31 otandyq óndirýshimen 2 022 ónim ataýyn jetkizýge 83 shart jasalǵan. Kásiporyndar úshin bul boljamdy suranys pen qýattylyqty júkteýdi, óndiristi keńeıtýdi jáne jańa preparattardy shyǵarýdy aldyn ala josparlaýǵa múmkindik beredi. Dárilik zattar GMP standarttary boıynsha shyǵarylady, — delingen habarlamada.
Qazaqstandaǵy farmatsevtıka salasyna sheteldik kompanııalar da ınvestıtsııa salyp jatyr. AstraZeneca, Pfizer jáne Roche óndiristi jergilikti jerde jolǵa qoıý jáne tehnologııalardy Qazaqstanǵa berý jobalaryna qatysýda. 2025 jyly farmatsevtıka ónerkásibine salynǵan ınvestıtsııa 56%-ǵa ósip, 142,8 mln dollarǵa jetti. Al 2026 jyldyń birinshi toqsanynda salaǵa taǵy 7,1 mln dollar ınvestıtsııa tartylǵan.
Farmatsevtıkalyq óndiristerdi salý jáne keńeıtý boıynsha segiz iri joba júzege asyrylyp jatyr. Jobalar iske qosylǵanda Qazaqstanda onkologııalyq, júrek-qan tamyrlary, aýtoımmýndy, orfandyq jáne ınfektsııalyq aýrýlardy, sondaı-aq qant dıabetin emdeýge arnalǵan 494-ten astam dári-dármek óndirý josparlanǵan.
Eske salaıyq, buǵan deıin Qazaqstanda halyq densaýlyǵyna qatysty negizgi kórsetkishter jaqsaryp kele jatqanyn jazǵanbyz. 2025 jyly eldegi kútiletin ómir súrý uzaqtyǵy 75,97 jasqa jetip, táýelsizdik jyldaryndaǵy eń joǵary kórsetkish tirkeldi.
