Qazaqstanda dári-dármekke qatysty shaǵymdar 18%-ǵa azaıdy
ASTANA. KAZINFORM – Qazaqstanda 2026 jyldyń alǵashqy toqsanynda dári-dármekpen qamtamasyz etýge qatysty turǵyndar shaǵymy ótken jyldyń sáıkes kezeńimen salystyrǵanda 18%-ǵa azaıdy. Bul týraly QR Densaýlyq saqtaý vıtse-mınıstri Tımýr Muratov OKQ alańynda ótken baspasóz konferentsııasynda málimdedi.
Onyń aıtýynsha, byltyr osy kezeńde dári-dármekke qatysty 13 myń shaǵym tirkelse, bıyl bul kórsetkish 11 myńǵa deıin tómendegen.
Vıtse-mınıstr qazirgi ýaqytta dári-dármekpen qamtamasyz etý júıesiniń ashyqtyǵy men qoljetimdiligin arttyrý baǵytynda jumystar jalǵasyp jatqanyn aıtty.
– Bıylǵy aqpan aıynan bastap Baılanys ortalyǵy táýlik boıy jumys isteý rejımine kóshti. Bul turǵyndardyń ótinishteri men saýaldaryna jedel jaýap berýge múmkindik berdi, – dedi Tımýr Muratov.
Sonymen qatar, azamattarǵa dári-dármektiń bar-joǵy týraly jedel aqparat berý úshin Telegram messendjerinde chat-bot iske qosylǵan. Vıtse-mınıstrdiń málimetinshe, servıs jumys isteı bastaǵaly beri 200-ge jýyq ótinish jedel qaralǵan.
Aıta keteıik, buǵan deıin Qazaqstanda tegin dári-dármekpen qamtylatyndar sany 3,4 mln adamǵa jetkeni habarlanǵan edi.
