Qazaqstanda dári-dármek baǵasy tómendedi, ıbýprofen 35%-ǵa arzandaǵan
ASTANA. KAZINFORM – Qazaqstanda 1,2 mlrd-qa jýyq dári-dármek qaptamasy tańbalanyp, onyń jartysy satylǵan. Tańbalaý júıesi dárilik zattardyń aınalymyn baqylaýǵa jáne dárihanalardaǵy baǵa ózgeristerin qadaǵalaýǵa múmkindik beredi.
Bul týraly Ortalyq kommýnıkatsııalar qyzmetinde ótken baspasóz máslıhatynda Saýda jáne ıntegratsııa vıtse-mınıstri Áset Núsipov málimdedi.
Onyń aıtýynsha, tańbalaý júıesi otandyq jáne ımporttyq dárilik zattardyń óndiris kólemin qadaǵalaýǵa, sondaı-aq olardyń satylymyna taldaý júrgizýge múmkindik beredi.
Qazirgi ýaqytta Qazaqstanda kún saıyn 750 myńnan 960 myńǵa deıin dári-dármek qaptamasy satylady. Dárihanalardaǵy satylymnyń eń tómengi kórsetkishi jeksenbi kúnderi tirkeledi.
– Júıe preparattardyń óńirlerdegi qaldyqtaryn baqylaýǵa múmkindik beredi: qaı dárihanada, qaı óńirde, qaı eldi mekende tapshylyq nemese artyq qor bar ekenin anyqtaýǵa bolady. Platformanyń ózi aýytqýlardy anyqtap, talaptardyń buzylý jaǵdaılaryn kórsetýge múmkindik beredi, – dedi Áset Núsipov.
Mınıstrlik dári-dármekterdiń baǵasyn baqylaý úshin de atalǵan júıeni paıdalanyp otyr.
– Mysaly, 2025 jylǵy mamyrda elimizdegi dárihanalarda «Ibýprofen» dárilik zatynyń ortasha baǵasy 1460 teńge bolsa, bıyl qazan aıynda ol eń tómengi deńgeıge – 941 teńgege deıin tústi, – dedi vıtse-mınıstr.
Osylaısha, atalǵan preparattyń ortasha baǵasy 519 teńgege nemese shamamen 35,5%-ǵa tómendegen.
Tańbalaý júıesi dári-dármekterdiń aınalymyn ashyq baqylaýǵa, óńirlerdegi qor kólemin anyqtaýǵa jáne baǵa ózgeristerin qadaǵalaýǵa múmkindik beredi.
Aıta keteıik, buǵan deıin Qazaqstanda shilde aıynda 589 dárilik preparattyń bólshek saýdadaǵy baǵasy tómendegeni habarlanǵan edi. Monıtorıng elimizdiń 20 óńirindegi 2 555 dárilik zatty qamtyǵan.
