Qazaqstanda dándi-daqyldardy jınaý jumystary 66% aıaqtaldy
«Bıyl aýyl sharýashylyǵy daqyldarynyń jalpy egis alańy 22,7 mln ga qurady. Onyń ishinde dándi jáne burshaqty daqyldar alańy - 15,8 mln ga. Bıylǵy egis naýqany qatań karantın rejıminde ótti, jaz maýsymy da ótken jyl sııaqty qurǵaq bolǵany belgili. Tótenshe jaǵdaı rejımine qaramastan, egis naýqany sapaly júrgizildi. Sapaly egis materıaldarymen, arzandatylǵan tyńaıtqyshtarmen, ósimdikterdi qorǵaý quraldarymen qamtamasyz etý, sondaı-aq tehnıkalyq jaraqtandyrýdy arttyrý boıynsha ýaqtyly qabyldanǵan sharalar qatań klımattyq jaǵdaıdyń áserin jumsartýǵa múmkindik berdi», - dedi Aıdarbek Saparov búgin Ortalyq kommýnıkatsııalar qyzmetinde ótken baspasóz máslıhatynda.
Vıtse-mınıstrdiń aıtýynsha, kútiletin ónim – aýyl sharýashylyǵy daqyldaryn qorǵaýǵa jáne olardyń sandyq jáne sapalyq kórsetkishterin arttyrýǵa baǵyttalǵan barlyq agrotehnologııalyq is-sharalardyń nátıjeleri. Bıyl egin jınaý jumystary ýaqtyly bastalyp, qazirgi kezde respýblıkanyń barlyq óńirinde júrgizilip jatyr. Naýqanynyń qarqyny ótken jylǵydan joǵary.
«Dándi-daqyldardy jınaý jumystary Jambyl oblysynda aıaqtaldy.Túrkistan jáne Batys Qazaqstan oblystarynda – aıaqtalý satysynda. Jedel derekterge sáıkes búgingi kúni respýblıka boıynsha barlyǵy 10,5 mln gektar dándi jáne dándi-burshaqty daqyldar nemese olardyń jalpy alańynyń 66% jınalǵan. Ortasha ónimdilik 11,7 ts/ga qurap, 12,2 mln tonna astyq bastyryldy. Búgingi tańda bizdiń aldymyzda turǵan eń basty mindet – ósirilgen egindi shyǵynsyz jınaý», - deıdi ol.