Qazaqstanda dala kıikteriniń sany 81 myń basqa jetti
qpannyń 10-y. QazAqparat /Qanat Mámetqazyuly/ - Búgin QR Aýyl sharýashylyǵy mınıstrligi Orman jáne ań sharýashylyǵy komıtetiniń uıymdastyrýymen Qazaqstandaǵy kıikterdiń bıoalýandyǵyn saqtaý taqyrybynda dóńgelek ústel jıyny bolyp ótti,
dep habarlaıdy QazAqparat.
Qazaqstan aýmaǵyndaǵy kıikter - ústirt, betpaqdala jáne oral taralymy sekildi úsh topqa bólinedi. Qazirgi kúngi elimizde meken etetin aqbókenderdiń jaıylymy negizinen onshaqty ákimshilik oblystyq aýmaqtardy qamtıtyn kórinedi. Buryn jyldary 1 mln. 200 myń bastan asatyn kıik sany sońǵy jyldary kúrt quldyrap - 21 myń basqa deıin azaıyp ketken bolatyn. Sondyqtan da, Qazaqstandaǵy kıikterdi saqtaý jalpyulttyq mindetke aınalǵan edi. «Shyǵys medıtsınasynda dárilik shıkizat retinde paıdalanylatyn bóken múıizi úlken suranys týdyryp, sonyń nátıjesinde janýarlar barlyq maýsym boıyna aýlanyp keledi. Máselen, kıik múıiziniń kılási ózimizdiń ishki naryqta 35-40 myń teńge tursa, Qytaıda bul 4 myń dollarǵa deıin baǵalanady eken. Aqbókender sanynyń kúrt túsip ketýiniń negizgi sebebi osy. Degenmen, sońǵy jyldary Úkimettik baǵdarlama qabyldanyp, arnaıy sharalar atqarylýynyń nátıjesinde Qazaqstanda kıikter sanynyń quldyraýy toqtatyldy. Máselen, Komıtet tarapynan qabyldaǵan is-sharalar nátıjesinde sońǵy 5 jyl kóleminde bókender sanynyń turaqty artýy baıqalyp otyr. 2009 jylǵy eseppen bulardyń sany 81 myńǵa deıin jetti. Degenmen, kıikter sanynyń jalpy turaqtanyp otyrǵany baıqalǵanymen de, Ózbekstan aýmaǵynda qystap shyǵatyn ústirttik taralymǵa jatatyn janýarlardyń sany tym tómendep otyr», dedi Orman jáne ań sharýashylyǵy komıteti tóraǵasynyń orynbasary Qaıyrbek Musabaev.
Onyń aıtýyna qaraǵanda, jyl saıyn Qazaqstannan Ózbekstanǵa qaraı qystap shyǵý úshin ketetin kıikterdiń jartysyna jýyǵy qaıtadan oralmaıtyn kórinedi.
