Qazaqstanda COVID-19 juqtyrǵandardyń 70 paıyzy naýqaspen baılanysta bolǵan

NUR-SULTAN. QazAqparat - Almaty men Nur-Sultan qalalarynda koronavırýs ınfektsııasy bir adamnan 2-7 adamǵa juqqan. Bul týraly QR Bas sanıtar dárigeri Aıjan Esmaǵambetova aıtyp berdi, dep habarlaıdy QazAqparat tilshisi.

«Qazirgi ýaqytta vırýs bizdiń ortamyzda júr, óz ishimizde vırýs taralyp jatqanyn eskertkim keledi. Elimizde tirkelgen 369 KVI juqtyrý jaǵdaıynyń 70% - naýqaspen baılanysta bolǵandar. ıAǵnı, jergilikti jaǵdaılar dep atalady, búl jaǵdaıda ınfektsııa oshaǵyn anyqtaý múmkin emes», - dedi bas sanıtarlyq dáriger Ortalyq kommýnıkatsııalar qyzmetinde ótken brıfıngte.

Onyń aıtýynsha, bir adam orta eseppen 4 adamǵa ınfektsııa juqtyra alady. Aýrý belgileri paıda bolmaı turyp-aq, adam boıynda ınfektsııa bolady.

«Almaty jáne Nur-Sultan qalalarynda bir naýqastan 2-7 adamǵa deıin aýrý juqtyrý jaǵdaılaryn keziktirdik. Bul derekter vırýstyń juǵý qaýpi joǵary ekenin taǵy da dáleldep otyr. Sondyqtan, eldegi, ár oblys, qala, aýdan, eldimekendegi jáne árbir otbasyndaǵy karantın - negizgi aldyn alý sharasy bolyp qala beredi. Artyq baılanysty toqtatyp, tolyq oqshaýlaný vırýstyń adamnan adamǵa taraýyn toqtatady», - dedi A. Esmaǵambetova.

Buǵan deıin A. Esmaǵambetova koronavırýs ınfektsııasynan qaıtys bolǵandardy jerleý algorıtmin túsindirgen edi.