Qazaqstanda COVID-19-dan ózin onlaın dıagnostıkalaý qyzmeti iske qosyldy

NUR-SULTAN. QazAqparat - «Elektrondy úkimet» portalynyń eGovMobile mobıldi qosymshasynda koronavırýs belgilerin anyqtaý úshin onlaın saýalnamadan ótýge bolady, dep habarlaıdy QazAqparat QR Densaýlyq saqtaý mınıstrligine silteme jasap.

Qyzmettiń bul túri QR Densaýlyq saqtaý mınıstrligi men «Ulttyq aqparattyq tehnologııalar» AQ birlesken jumysynyń nátıjesinde jasaldy.

«Koronavırýstyń belgilerin anyqtaý boıynsha ózin ózi onlaın dıagnostıkalaý qyzmeti eGovMobile qosymshasynyń basty betinde «COVID-19 belgileri boıynsha saýalnama» ataýymen jeke batyrma retinde ornalasqan. Qyzmet úsh tilde (qazaqsha, oryssha, aǵylshynsha) qoljetimdi. Saýalnamany toltyrý úshin azamattar 12 suraqqa Iá/Joq dep jaýap beredi, qajet bolǵan jaǵdaıda jeke aqparattardy engizedi. Toltyryp bolǵannan keıin «Saýalnamany jiberý» batyrmasyn basý kerek», delingen habarlamada.
Aqparat ary qaraı óńdeýden ótý úshin QR Densaýlyq saqtaý mınıstrligine túsedi.
Sonymen qatar, azamattar eGovMobile arqyly «COVID-19 kartasy», «COVID-19 týraly FAQ» qyzmetterinen koronavırýs týraly jıi qoıylatyn suraqtarǵa jaýap ala alady. Sondaı-aq mobıldi qosymsha naqty ýaqyt rejıminde Qazaqstan aýmaǵyndaǵy vırýstyń taralý jaǵdaıy men indeti rastalǵandarmen qatynasta bolǵandar jaıly ózekti aqparattardy usynady.