Qazaqstanda COVID-19 boıynsha aqyly vaktsınalaý ruqsat etilmegen - mınıstr
NUR-SULTAN. QazAqparat – Qazaqstanda koronavırýsqa qarsy aqyly vaktsınalaý ruqsat etilmegen. Bul týraly Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.
«Qazirgi kezde tek memlekettik aınalymda paıdalanylatyn vaktsına retinde Qazaqstanǵa resmı jetkizilgen jáne óndirilgen ekpe qamtylǵan. Mindetti áleýmettik medıtsınalyq saqtandyrý júıesine qatysqan jeke klınıkalar Qormen kelisimshartqa otyrǵan. Osy oraıda olar ekpe alýǵa jatatyn adamdarǵa aqysyz negizde vaktsına salady», - dedi mınıstr Ortalyq kommýnıkatsııalar qyzmetinde.
Sonymen qatar, A. Tsoı el aýmaǵynda vaktsınanyń satylýy jaǵdaıy anyqtalǵanda mindetti túrde habarlaýǵa shaqyrdy.
«Sebebi qazirgi ýaqytta Qazaqstanda vaktsınany resmı satý ruqsat etilmegen», - dedi vedomstvo basshysy.
Budan buryn habarlanǵandaı, Alekseı Tsoı sońǵy 2 aptada Almaty, Nur-Sultan, Shymkent qalalarynda, Aqtóbe, Almaty oblystarynda naýqas sany artyp, jalpy KVI juqtyrǵandar 1,5 ese óskenin aıtty.
«Halyq arasynda vırýstyń qaýiptiligine senbeıtin adamdar bar, olar úılený toılaryn, banketterdi jeke úıler men kottedjderde ótkizýdi jalǵastyryp keledi», - dedi mınıstr.
