Qazaqstanda tsıklon saldarynan jaýyn-shashyn, jel, kóktaıǵaq kútilýde - 23 qazanǵa arnalǵan aýa raıy boljamy
ASTANA. 22 qazan. QazAqparat - Tsıklon jáne onymen baılanysty atmosferalyq aǵymdar 23 qazan kúni Qazaqstannyń kóptegen aýmaǵyna áserin tıgizedi, onymen birge birqatar aımaqtarda jaýyn-shashyn, ekpindi jel, kóktaıǵaq kútilýde, dep habarlaıdy Qazgıdrometke silteme jasaı otyryp TJM-niń baspasóz qyzmetinen.
Respýblıkanyń ońtústik, ońtústik-batys bóliginde ǵana jaýyn-shashynsyz aýa raıy saqtalady.
Qostanaı, Pavlodar, Aqmola, Soltústik Qazaqstan, Qaraǵandy, Shyǵys Qazaqstan, Jambyl, Aqtóbe oblystarynda, kúndiz Ońtústik Qazaqstan oblysynda jyldamdyǵy 15-22 m/s deıin jel soǵady.
Atyraý, Batys Qazaqstan oblystarynda túnde jáne tańerteń keıbir jerlerde tuman túsedi dep kútiledi. Soltústik Qazaqstan jáne Qostanaı oblystarynda kóktaıǵaq bolýy yqtımal.
Aldaǵy táýlikterde respýblıkanyń taýly ózenderinde sý deńgeıleriniń aýytqýlary kútiledi. Qazaqstannyń soltústik oblystaryndaǵy sý nysandarynda sý betiniń odan ári salqyndaýy baıqalady.
