Qazaqstanda tsıfrlyq Ulys jýrnaly ashyldy
«Biz jaqsy sapaly ári tereń tanymdyq dúnıelerdi, álemde ásirese medıa salasynda bolyp jatqan eń sońǵy jańashyldyqtardy halyqqa jetkizýimiz kerek degen nıetpen «Ulys» jobasyn bastadyq», - dedi joba avtory ári jýrnaldyń bas redaktory Erjan Qalymbaı.
Redaktor jınalǵandarǵa jýrnaldyń qurylymy men mazmunyn túsindirip, tanystyrylymyn ótkizdi. Basylymnyń birinshi betinde ózindik aıtar oıy bar, shetelde oqyǵan bilimdi ári isker jastar kórsetiledi. Avtordyń sózimen aıtsaq, ondaǵy maqsat - aqyldy jastardy sánge aınaldyrý. Árbir sanda Qazaqstan men Túrki álemine qatysty saraptamalyq maqalalar men suhbattar jarııalanady.
«Sonymen qatar, Túrki álemi men Orta Azııa ıntegratsııasyna basymdylyq berip otyrmyz. Budan bylaı qyrǵyzdar qyrǵyzsha, ózbekter ózbekshe beredi maqalasyn. Bul tek qana Qazaqstanda ǵana emes, halyqaralyq deńgeıde bolsa degen oıymyz bar. Máselen, alǵashqy nómirinde «Qazirgi qyrǵyz jastary neni qyzyqtaıdy?» degen maqala shyqty. Uqsas ári týys halyq bolǵan soń, qazirgi problemamyz ben jastardyń kózqarastary óte uqsaıdy eken», - dedi Erjan Qalymbaı.
Sondaı-aq ulttyq múdde men Alash taqyrybyna arnalǵan turaqty aıdar bolady.
«Ulys» jýrnalynyń tusaýyn Alashtyń birtýary Ahmet Baıtursynulynyń týǵan kúniniń qurmetine kesýdi jón kórdik. Onyń keremet sózi bar «El búgingi úshin, meni erteńgi úshin» degen. Sondyqtan qazaqtyń árbir azamaty erteńi úshin ólmeıtindeı dúnıe jasasa degen nıetpen osy sharýany bastap otyrmyz», - dedi jýrnal redaktory.
Jýrnal Digital formatyndaǵy sońǵy úlgidegi tájirıbelerge negizdelip jasalǵan. Máselen, maqalany oqýmen qatar, aýdıo jazbasyn tyńdaýǵa nemese beınejazbasyn kórýge múmkindik bar.