Qazaqstanda tsıfrlyq teńge engizgen soń ne ózgeredi – sarapshy pikiri

NUR-SULTAN. QazAqparat – Ulttyq bank osy jyldyń sońyna qaraı tsıfrlyq teńgeni engizýge qatysty sheshimin jarııa etedi. Osy oraıda qarjy konsýltanty ári ınvestor Álibek Jalǵasbaev tsırflyq teńge qazaqstandyqtar úshin neni bildiretinin túsindirdi, dep habarlaıdy QazAqparat tilshisi.

«Siz nelikten Kaspi-ge kóshkenimiz jaıly oılanyp ta kórgen joqsyz. Erterekte qaǵaz aqshamen, tıynmen tólem jasaıtynbyz. Al, qazir dúkenderde artyq tólegen aqshańyzǵa qaıtarym jasamaıdy. Óıtkeni, tikeleı aýdarym jasaısyz. Bul óte yńǵaıly, komıssııa, eshqandaı shekteýler joq. Al, basqa bankterdi qoldanǵan kezde belgili bir qıyndyqtar, onyń ishinde komıssııa týyndaıdy. Tsıfrlyq teńge – valıýtany damytýdyń kelesi kezeńi. Ony qadaǵalap otyrýǵa bolady. Máselen, sizdiń kompanııańyz, jeke kásipkerligińiz nemese jaýapkershiligi shekteýli seriktestigińiz bar delik. Onda sizde óte kóp qujattama bolady. Esep-qısap tapsyryp, salyq, saqtandyrý tóleýińiz qajet. Tsıfrlyq teńge kómegimen munyń bárin jasaý jeńildeı túsedi. Tranzaktsııa tarıhy da qoljetimdi bolady. Buǵan qosa, bul jalǵan aqshadan qosymsha qorǵanys bolady. Internetsiz-aq tólem jasaý múmkindigin alasyz, ıaǵnı barynsha qolaıly bola túsedi», - dep túsindiredi sarapshy.

Onyń atap ótýinshe, tsıfrlyq teńge áli de ázirlený satysynda bolǵanymen, onyń qoldanylý aıasy keń.

«Ol ulttyq valıýta men krıptovalıýta arasyndaǵy býdanǵa aınalmaq. Degenmen, memleket tarapynan oǵan baqylaý da, qadaǵalaý da bolady. Aıta keterligi, Qazaqstan qarjy tehnologııasy boıynsha TMD elderi arasynda birinshi orynda tur. Grýzııa nemese Túrkııada áli kúnge deıin qolma-qol aqshamen tólem jasalady. Aýdarym jasaı salý joq. Tipti, keı jerlerinde karta da qabyldamaıdy», - dedi Álibek Jalǵasbaev.

Sarapshynyń paıymynsha, tsıfrlyq ulttyq valıýta engizý eńbek naryǵyna esh áser etpeıdi.

Degenmen, tsıfrlyq teńgeniń eńbek naryǵyna qandaı da bir qatty áseri bola qoıady dep oılamaımyn.

Ol kásiporyndardyń, qadaǵalaýshy, salyq organdarynyń jumysyn jeńildetedi jáne barynsha ashyq, jyldam bola túsedi.

«Tsıfrlyq teńgeni engizý qarjy dırektorlaryna, býhgalterlerge júktemeni azaıtýy da múmkin. Biraq, valıýtanyń qandaı qyzmeti bolatynyn jáne bolmaıtynyn áli bilmeımiz. Qalaı desek te, ІT mamandaryna suranys odan saıyn artady», - dedi ol.