Qazaqstanda tsıfrlyq saýattylyqty arttyrýdyń qadamdary baıandaldy
Mınıstr elimizde onlaın saýdany jetildirý maqsatynda elektrondyq saýdany damytý jónindegi jol kartasy bekitilgenin eske salyp ótti. Jol kartasynyń 17-shi tarmaǵyna sáıkes, vedomstvo jergilikti atqarýshy organdarmen birlese «Tsıfrlyq Qazaqstan» baǵdarlamasy aıasynda halyqtyń tsıfrlyq saýattylyǵyn arttyrý sharalaryn qarastyrǵanyn aıtty.
«Osynyń nátıjesinde, atalǵan kórsetkishti (tsıfrlyq saýattylyq deńgeıin - avt.) 2022 jylǵa qaraı 83 paıyzǵa jetkizý, ıaǵnı 2017 jylǵy kórsetkishten 7,5 paıyzǵa ósirý josparlanýda. Sondaı-aq «Tsıfrlyq Qazaqstan» aıasynda jergilikti atqarýshy organdardyń oqytýdy júrgizetin kásibı kadrlary sanyn arttyrý da qamtylǵan. Tsıfrlyq bilim búgingi kúni barlyq salada suranysqa ıe ekenin eskeretin bolsaq, halyqtyń osy baǵyttaǵy bilimin kóterý asa mańyzdy ekeni anyq. Alaıda júrgizilgen saýalnama qorytyndysyna sáıkes, aǵymdaǵy jyly kompıýterlik saýattylyqqa oqytý elimizdiń tek 7 aımaǵynda júrgizilgen. Jalpy, 84 myń adam oqytylǵan. Jyl sońyna deıin josparǵa sáıkes taǵy 12 myń azamat bilim alýy tıis. Sonymen qatar jergilikti atqarýshy organdar oqytýdy eski baǵdarlama boıynsha júrgizetinin aıta ketken jón. Sondyqtan memlekettik baǵdarlama aıasynda jergilikti atqarýshy organdar aldynda adam kapıtalyn damytý baǵyty boıynsha halyqty tsıfrlyq bilimniń bazalyq kýrsynan ótkizý mindeti tur», - dep túsindirdi mınıstr.
Osy oraıda Dáýren Abaev mınıstrlik óz kezeginde osyny iske asyrý jóninde biryńǵaı ádisteme ázirleýdi josparlap otyrǵanyn atap ótti.
«Munymen qosa, biz statıstıkalyq-eseptik úshin ádistemelik erejege tsıfrlyq saýatylyqqa anyqtama berý jáne tsıfrlyq saýattylyq daǵdysyn arnaıy formasy negizinde anyqtaýǵa qatysty usynys engizdik. Qazirgi ýaqytta buıryq kelisý úshin Ádilet mınıstrliginde qaralýda», - dedi vedomstvo basshysy.
Jol kartasynyń 19-shy tarmaǵyna qatysty mınıstrlik 2018-2020 jyldarǵa josparlanǵan «Qýatty Qazaqstan» biryńǵaı respýblıkalyq medıa-josparyna ózgeris engizýdi kózdep otyr. Jospardyń aıasynda buqaralyq aqparat quraldaryn elektrondyq saýdany nasıhattaýǵa qatysty is-sharalar qarastyrylmaq. Jol kartasynyń 24-shi tarmaǵy boıynsha turǵyndar arasynda ınternet jelisin qoldanýshylaryn arttyrý josparyna saı, mınıstrlik symdy ári symsyz tehnologııalar arqyly ınfraqurylymǵa qol jetimdilikti qamtamasyz etedi.
«Joba boıynsha 2021 jylǵa qaraı 1 200-ge jýyq aýyldyq eldi mekendi jyldamdyǵy joǵary ınternetpen qamtamasyz etý josparlanǵan. Osynyń arqasynda jergilikti atqarýshy organdar men memlekettik organdarda 3 600 baılanys núktesi qosylady. Jalpy, optıkalyq-talshyqty baılanys jelilerin qurý - ınternet qoldanýshylar úlesin 2022 jylǵa qaraı 82 paıyzǵa jetkize otyryp, elektrondyq kommertsııany damytýǵa serpin beredi dep senemiz», - dep túıindedi sózin mınıstr.
