Qazaqstanda tsıfrlyq ekonomıkany damytatyn qandaı jobalar iske asyrylýda

ASTANA. QazAqparat - QR Premer-Mınıstriniń orynbasary Asqar Jumaǵalıev Qazaqstanda tsıfrly ekonomıkany damytý baǵytynda júzege asyrylǵan jobalar týraly aıtyp berdi, dep habarlaıdy QazAqparat tilshisi.

«Ekonomıka salalaryn jedel tehnologııalyq modernızatsııalaý jáne eńbek ónimdiligin tsıfrlyq tehnologııalarmen arttyrýǵa qatysty kelesi sharalar qabyldanýda. Tsıfrly ekonomıkany damytý úshin bıylǵy jyldyń ózinde tıimdilik beretin birqatar jobalar júzege asyrylyp jatyr. Naqtyraq aıtqanda, aqshasyz tólemder, Astana-1, taýarlardy markırovkalaý, vırtýaldy-qoıma jobalary esebinen salyqtyq túsimderdiń ósimi anyq baıqalady. Tsıfrlyq ınfraqurylym, málimetterdi óńdeý ortalyǵy sekildi taǵy basqa da jobalar bar. Mysaly, taýarlardy markırovkalaý shaǵyn joba bolsa da, jyl sońynda 300 mln teńgelik effekt kútilýde. Bul jobany basqa da taýarlarǵa qoldansaq, tıimdiligi qomaqty bola túsedi. Baqytjan Ábdiruly, sizdiń tapsyrmańyz boıynsha bul jobany qarqyndy túrde ary qaraı júrgizetin bolamyz», - dedi Asqar Jumaǵalıev Úkimet otyrysynda.

Premer-Mınıstrdiń orynbasary kelesi mysal retinde elektrondy saýdany atady.

«Osy jyldyń birinshi jartyjyldyǵynda ǵana elektrondy saýda kólemi 101 mlrd teńgeni qurady. Bul ótken jyldyń osy kezeńimen salystyrǵanda eki ese kóp kórsetkish bolyp otyr. Qazirgi ýaqytta biz memlekettik organdarmen bul jobalardy iske asyryp, tırajdaıtyn bolamyz. Bul jumys ta bizdiń turaqty baqylaýymyzda», - dep túıdi Asqar Jumaǵalıev.