Qazaqstanda «Tsıfrlyq áleýmettik ámııan» jobasy qalaı júzege asyrylady
NUR-SULTAN. QazAqparat – Saýda jáne ıntegratsııa mınıstri Baqyt Sultanov Qazaqstanda «Tsıfrlyq áleýmettik ámııan» jobasy qalaı júzege asyrylatynyn aıtyp berdi, dep habarlaıdy QazAqparat tilshisi.
«Taýarlardy taratý júıesiniń fýnktsıonaldyq múmkindigi - qazaqstandyqtardyń tsıfrlyq áleýmettik ámııany bolmaq. Ony engizý de bıylǵy Joldaýda tapsyrylǵan edi. «Tsıfrlyq ámııandy» iske asyrýdyń maqsaty - bir jaǵynan azamattarǵa áleýmettik kómekke bólingen bıýdjettik resýrstardyń maqsatty paıdalanylýyn, ekinshi jaǵynan, ol resýrstardyń otandyq óndirýshilerge jasyryn qoldaý túrinde «qaıtarylýyn» qadaǵalaý», - dep túsindirdi Baqyt Sultanov.
Mınıstrdiń aıtýynsha tsıfrlyq ámııan áleýmettik mańyzy bar azyq-túlikti satyp alýǵa, bıznes iske asyratyn jumys pen qyzmetke aqy tóleýge arnalǵan.
«Mysaly Ulttyq taýar taratýshy júıesi mehanızminiń máni – satyp alýshyǵa ónimdi jedel ári tıimdi túrde jetkizý. Munda satyp alýshynyń paıdasy – taýardyń deldalsyz jaqsy sapada kelýi. Al áleýmettik kómek alatyn azamattar qolma-qol aqshasyz arnaıy júıe arqyly osy otandyq taýarlardy tikeleı fermerlerge jiberý arqyly ala alady. Osylaısha múddeleri toǵysqan taýar óndirýshi men tutynýshyny bir-birine úırete otyryp, biz Ulttyq taýar taratýshy júıesi arqyly taýar-aqsha aınalymynyń sheńberin túıindeımiz», - deıdi Baqyt Sultanov.
