Qazaqstanda «Tsıfrly Ásker» baǵdarlamasy júzege asyrylmaq

ASTANA. QazAqparat - Qazaqstannyń Qarýly kúshterinde «Tsıfrly Ásker» baǵdarlamasy jasaqtaldy. Bul týraly búgin Ortalyq kommýnıkatsııalar qyzmetinde ótken brıfıngte Bas shtab basshysynyń orynbasary, general-maıor Muhamedjan Talasov málim etti, dep habarlaıdy QazAqparat.

«Qazaqstan Prezıdentiniń «Tsıfrly Qazaqstan» baǵdarlamasyn júzege asyrý maqsatynda áskerdiń kúndelikti qyzmetin tıimdi basqarý úshin jańa aqparattyq tehnologııalardy qoldaný arqyly «Tsıfrly Ásker» baǵdarlamasy jasaqtala bastady. Ol «Tsıfrly Qazaqstan» baǵdarlamasymen yqpaldastyrylady. Atap aıtqanda, ulttyq jerseriktik baılanys júıesi negizinde jerseriktik baılanystyń jerdegi jelisin qurý, basqarý nysandarynda aqparattyq-telekomýnıkatsııalyq ınfraqurylymdardy salý, Qorǵanys mınıstrliginiń tsıfrlyq ǵylymı-eksperımentaldy bazasyn damytý, aqparattyq qaýipsizdiktiń áskerı-ǵylymı habyn jasaqtaý jáne arnaıy maqsattaǵy geoaqparattyq platformany qurý», - dedi M. Talasov.

Onyń sózinshe, joǵaryda atalǵan jobalardy júzege asyrý qupııa aqparattarmen almasýdyń qaýipsiz júıesi - málimettermen almasýdyń turaqty júıesine negizdelgen tsıfrlyq qupııalandyrylǵan qujat aınalymyn qurýǵa septigin tıgizedi.

Sonymen qatar «Tsıfrlyq áskerı bilim berý jáne ǵylym» jobalaryn júzege asyrý áskerı bilim berý mekemeleriniń bazasynda ǵylymı ınnovatsııalardyń damýyna jol ashady. Al «Tsıfrly áskerı medıtsına» áskerı-medıtsınalyq bólimsheler men mekemelerde áskerı qyzmetkerlerge jáne olardyń otbasylaryna kórsetiletin medıtsınalyq qyzmetterdiń sapasyn arttyrýǵa septesedi.