Qazaqstanda Chehııa men Polshadan ákelinetin alkogol ónimderine baqylaý kúsheıtiledi
ASTANA. 19 qyrkúıek. QazAqparat - Cheh Respýblıkasynda jáne Polsha Respýblıkasynda alkogol ónimin paıdalaný saldarynan adamdar óliminiń oryn alýyna baılanysty Qazaqstanǵa atalǵan elderde shyǵarylǵan alkagol ónimderine baqylaý kúsheıtiledi.
Bul týraly Densaýlyq saqtaý mınıstrliginiń baspasóz qyzmetinen habarlandy.
«Atap aıtqanda Chehııada shyǵarylǵan araqty jáne romdy paıdalanýda ólim-jitim jaǵdaılarynyń tirkelýine baılanysty Qazaqstan Respýblıkasynyń sanıtarııalyq qyzmeti Memlekettik sanıtarlyq-epıdemıologııalyq qadaǵalaý komıtetiniń aýmaqtyq departamentterine Chehııa men Polshada shyǵarylǵan, kúshtiligi 20 gradýstan joǵary alkogol ónimderin Qazaqstan Respýblıkasynyń aýmaǵyna ákelýge jáne onyń aınalymyna baqylaýdy kúsheıtý týraly tapsyrma berdi», - delingen baspasóz habarlamasynda.
Eske sala ketsek, budan buryn Chehııada sapasyz alkogoldik sýsynynan adamdardyń jappaı ýlanýynan tótenshe jaǵdaı jarııalanǵan bolatyn. Atap aıtqanda, arzan araq pen romǵa qosylǵan metanoldan ýlanǵan 15 adam kóz jumyp, 24-i aýrýhanaǵa túsken edi. Keıin Chehııa polıtsııasy kontrafaktilik alkogol búkil elde satylyp jatqanyn anyqtady. Eldiń premer-mınıstri Petr Nechas otandastaryn «qalaı jasalǵany beımálim alkogoldan» bas tartýǵa shaqyrǵan-dy.
