Qazaqstanda BJZQ-dan aı saıyn beriletin zeınetaqy tólemderi ósedi

NUR-SULTAN. QazAqparat - 2021 jyldyń 1 sáýirinen bastap Biryńǵaı jınaqtaýshy zeınetaqy qorynan aı saıynǵy tólemdi esepteýdi júzege asyrý ádistemesi ózgeredi. Osy oraıda atalǵan qordyń baspasóz qyzmeti BJZQ-dan zeınetaqy tólemderin júzege asyrý tártibine túsinikteme berdi.

BJZQ-dan zeınetaqy tólemderi alýshynyń jeke zeınetaqy shotyndaǵy jınaqtary taýsylǵanǵa deıin QR Úkimetiniń №1042 qaýlysyna sáıkes eseptelgen mólsherde belgilengen keste boıynsha aı saıyn júzege asyrylady.

«Qoldanystaǵy tártipke sáıkes tólemderdiń jyldyq somasy jınaqtalǵan somanyń zeınetke shyqqannan keıin 79 jasqa deıingi ortasha ómir súrý uzaqtyǵyn eskeretin aǵymdaǵy qun koeffıtsıentine kóbeıtindisi retinde esepteledi. Bul rette zeınetaqy tólemderin ındeksteý kózdelmegen», - delingen BJZQ baspasóz qyzmetiniń málimetinde.

Budan basqa, BJZQ-dan tólenetin aı saıynǵy tólemderdiń mólsheri zeınetaqy jınaqtarynyń aǵymdaǵy qaldyǵynyń tómendeýin eskere otyryp, jyl saıyn tómendetiledi. Nátıjesinde, jańa kúntizbelik jyldaǵy aı saıynǵy tólemderdiń mólsheri ótken jylǵa qaraǵanda tómen bolyp qalyptasady.

Tólemderdiń aǵymdaǵy tártibi zııandy eńbek jaǵdaılary bar jumystarmen aınalysatyn qyzmetkerlerdiń, sondaı-aq, 1 jáne 2-toptardaǵy merzimsiz múgedektigi bar adamdardyń, ıaǵnı osyndaı sanattaǵy azamattardyń zeınetke shyqqannan keıingi ómir súrý uzaqtyǵyndaǵy qazirgi aıyrmashylyqqa baılanysty múddelerin eskermeıdi.

«Zeınetaqy tólemderiniń mundaı tártibi 90-jyldardyń aıaǵy men 2000-jyldardyń basynda qabyldandy jáne halyqaralyq tájirıbe men búgingi kúnniń bolmysyn eskere otyryp, ózektendirýdi talap etti.

Ótken 20 jyl ishinde Qazaqstanda zeınetkerlik jasqa tolǵannan keıingi ómir súrý uzaqtyǵy ósip, sáıkesinshe er adamdar úshin 80 jas jáne áıelder úshin 82 jasty qurady. Tólemderdiń jańa tártibi zeınetaqy tólemderi kezeńin alýshylardyń ómir súrý uzaqtyǵynyń ortasha kezeńimen sáıkestendiredi, sondaı-aq, BJZQ-dan tólenetin zeınetaqy tólemderiniń jyl saıynǵy qaıta esepteýin 5%-ǵa qamtamasyz etedi», - dep atalyp ótken Qor habarlamasynda.

Sonymen qatar, eńbek jaǵdaılary zııandy jumystarmen aınalysatyn qyzmetkerler, 1 jáne 2-toptaǵy merzimsiz múgedektigi bar adamdar úshin zeınetaqy tólemderiniń mólsherine qosymsha ulǵaıtý koeffıtsıentteri kózdelgen.

Osylaısha, Úkimet Qaýlysynda azamattardyń ártúrli sanattarynyń ómir súrý jáne eńbek etý uzaqtyǵy men jaǵdaılary eskerilgen.

«Sondaı-aq, BJZQ-dan tólenetin eń tómengi zeınetaqy tóleminiń mólsheri de ósti. Buryn ol árbir qarjy jylyna belgilengen eń tómengi kúnkóris deńgeıiniń 54% qurasa, endi eń tómengi kúnkóris deńgeıiniń 70% deıin ulǵaıtyldy. Nátıjesinde, eń tómengi zeınetaqy tólemderin alýshylar úshin BJZQ-dan aı saıyn beriletin zeınetaqy tólemderi ulǵaıatyn bolady.

Úkimettiń Qaýlysyna sáıkes, alýshylarǵa zeınetkerlikke shyqqan birinshi jyly tólenetin aı saıynǵy tólemderdiń mólsheri 6,5% mólsherlememen jınaqtalǵan zeınetaqy somasynyń on ekiden bir kóbeıtindisi retinde anyqtalatyn bolady. Budan ári tólemderdiń mólsheri jyl saıyn ındeksteý esebinen ulǵaıatyn bolady, ıaǵnı tólemder zeınetaqy jınaqtarynyń aǵymdaǵy somasyna áser etetin ınvestıtsııalyq tabystylyqtyń qubylmalylyǵyna baılanysty bolmaıdy», - dep naqtylady BJZQ mamandary.

Olardyń paıymynsha, munyń bári azamattarǵa zeınetaqy tólemderiniń túsinikti ári boljamdy tártibin qamtamasyz etedi.

Tólemderdiń ózgertilgen tártibi 2021 jylǵy 1 sáýirden bastap týyndaǵan qatynastarǵa qoldanylady.

BJZQ-dan zeınetaqy tólemderin alý quqyǵyn 2018 jylǵy 1 qańtarǵa deıin iske asyrǵan adamdarǵa zeınetaqy tóleminiń jyl saıynǵy mólsheri saqtalady jáne eń tómen zeınetaqynyń otyz eselengen mólsherinen kem bolmaıdy (2021 jyly 30 h 43 272 = 1 298 160 teńge). Tólemder buryn tańdalǵan keste boıynsha júzege asyrylady.

«BJZQ-dan zeınetaqy tólemderin alý quqyǵyn 2018 jylǵy 1 qańtardan bastap 2021 jylǵy 31 naýryzǵa (qosa alǵanda) deıin iske asyrǵan adamdarǵa zeınetaqy tólemderiniń mólsherin esepteýdi júzege asyrýdyń jańa ádistemesine sáıkes, 2022 jylǵy 1 qańtardan bastap aı saıynǵy zeınetaqy tólemderi 5% ındeksteý mólsherlemesine ulǵaıtylatyn bolady, keıinnen jyl saıyn qaıta eseptelip otyrady», - delingen BJZQ málimetinde.

BJZQ-dan zeınetaqy tólemderi jeke zeınetaqy shotyndaǵy zeınetaqy jınaqtary taýsylǵanǵa deıin burynǵydaı júzege asyrylatyn bolady.

Budan buryn habarlanǵandaı, bıylǵy 1 sáýirden bastap zeınetaqy tólemin e septeýdiń tártibi ózgeredi.