Qazaqstanda bıýdjettik qarajatty tıimdi paıdalaný úshin 1,5 trln teńge únemdeldi

ASTANA.KAZINFORM – Qazaqstandaǵy ishki memlekettik aýdıttiń jańǵyrýy: bastaýdan ozyq tehnologııalarǵa deıin taqyrybynda ótken brıfıng barysynda jýrnalıster sý tasqynynan keıin Prezıdenttiń «eldegi barlyq is-sharalardy rettep, qarajatty únemdep, durys baǵyttaǵy sharalardy ótkizemiz» degen sózine baılanysty, qanshalyqty qarjy únemdelgenin surady.

QR Qarjy mınıstrligi Іshki memlekettik aýdıt komıtetiniń tóraǵasy Erjan Myńjasarov Ortalyq kommýnıkatsııalar qyzmeti alańynda jaýap berdi.

– Bul suraq tikeleı bizdiń quzyretimizge kirmeıdi. Alaıda baıandamamda aıtqandaı, bıýdjetti aldyn ala josparlaý kezinde biz kameralyq baqylaý arqyly bıýdjettik ótinishterdi monıtorıngtedik. Negizsiz josparlanǵan qarajattardy anyqtap, 1,5 trln teńgege deıin únemdeýge, negizsiz faktilerdi joıyp, bıýdjetti bekitýge deıin túzetýge múmkindik aldyq, – dedi ol.

Sonymen qatar jýrnalıster 2024 - 2026 jyldar aralyǵynda únemdelgen qarajattyń qaı salada jumsalmaǵanyna da mán berdi. 

– Respýblıkalyq bıýdjet boıynsha 23 ortalyq organnyń ótinishi qaralǵan, olardyń jartysynan kóbinde kemshilikter anyqtalǵan, - dedi Erjan Myńjasarov. 

Ol áleýmettik salada 1 mıllıardtan astam qarajattyń onlaın bıýdjet monıtorıngi barysynda únemdelgenin atap ótti. Ásirese bilim salasynda Jetisý jáne Qyzylorda oblystarynda aılyq aqylardy tóleý kezinde jymqyrý faktileri anyqtalyp, quqyq qorǵaý organdarymen birlesip tıisti sharalar qoldanylǵan. 
Sonymen qatar Erjan Myńjasarov óziniń baıandamasynda «Memlekettik josparlaý» aqparattyq júıesiniń onlaın bıýdjettik monıtorıng ınstıtýty 2026–2028 jyldarǵa arnalǵan bıýdjettik qarajatty shamadan tys jáne negizsiz josparlaý faktilerin anyqtap, toqtatýǵa múmkindik berdi. Bul jalpy 1,5 trln teńgege deıingi somany qamtıdy dep habarlady.

Aıta keteıik, Prezıdent aldaǵy úsh jylǵa arnalǵan bıýdjet týraly zańdy maquldady.