Qazaqstanda byltyr ekstremıstik jáne terrorıstik qylmystar boıynsha 143 adam jazaǵa tartyldy
Bas prokýratýra saıtynda jarııalanǵan málimetterge qaraǵanda, qazirgi tańda radıkaldy ıdeologııamen áýestengen tulǵanyń tıptik beınesi jasalynǵan. «Bul kóbinese ótken ómiri krımınaldy, turaqty jumysy jáne joǵary bilimi joq jastar. Olardyń dinı saýaty tómen. Dinı ádebıetterdi oqymaǵan jáne oqyǵysy da kelmeıdi. Ózderiniń din, jaqsylyq jáne jamandyq týraly kózqarastaryn ınternetten alynǵan kúmándi materıaldarǵa negizdeıdi. Terrorızmdi nasıhattaıtyndarǵa oılanbastan senedi. Kúmándi aqparat arqyly radıkalızmge tartylýdyń birinshi satysy bastalady. Azǵyryp kóndirýshiler azamattardyń materıaldyq jáne áleýmettik-turmystyq problemalaryn paıdalana otyryp, olarǵa ústemdik júrgizedi. Osyndaı nasıhattaýshylardyń yqpalyna túskender jańa ekstremısterdi jasaqtaýdyń qolaıly quralyna aınalady. Nátıjesinde olar ekstremıstik jáne terrorıstik qylmystardy jasaý jolyna kóshedi», - delingen baspasóz baıanynda.
Osy faktorlardy eskere otyryp, byltyr Aqtóbe oblysynda turǵyndardyń áleýmettik-ekonomıkalyq problemalaryn sheshý jónindegi joba iske asyrylǵan. Oǵan teolog, tájirıbeli ımam, dáriger, qarjyger, psıholog jáne jumyspen qamtý ortalyǵynyń qyzmetkerlerin qosa alǵanda 230 bilikti maman tartyldy.
«Ekstremızm men terrorızmge qarsy is-qımyldyń mańyzdy bóligi Internetti paıdalana otyryp qarsy nasıhat júrgizý. Jalpy, 2016 jyly Bas prokýratýra Aqparat jáne kommýnıkatsııalar mınıstrligine ınternet-resýrstardyń 33 materıalyna qol jetimdilikti ýaqytsha toqtatý boıynsha sharalar qabyldaý týraly 7 uıǵarym engizdi. Mazmunynda ekstremızm men terrorızmdi nasıhattaıtyn 95 silteme oqshaýlandy», - delingen baspasóz baıanynda.
