Qazaqstanda byltyr 430 myń tonnadan astam et óndirildi

NUR-SULTAN. QazAqparat - 2020 jylǵy qańtar-qarasha aılarynda Qazaqstanda et óndirý kólemi (qus etin qospaǵanda) 435 myń tonnadan asty. Bul 2019 jyldyń sáıkes kezeńimen salystyrǵanda 3,2% artyq, dep habarlaıdy QazAqparat.

QR Aýyl sharýashylyǵy mınıstrliginen málim etkendeı, sondaı-aq, shujyq ónimderin óndirý 12% (48-den 53,8 myń tonnaǵa deıin), et konservilerin óndirý 13,8% (7,7-den 8,8 myń tonnaǵa deıin) artty.

Sıyr etiniń eksporty ótken jyldyń qańtar-qazan aralyǵynda 26,4 mln AQSh dollaryn qurady.

«Otandyq daıyn ónim óndirisiniń ósýi mal sharýashylyǵy jáne et óńdeý salalaryndaǵy memlekettik kómektiń ulǵaıýyna baılanysty boldy. Sonymen qatar, óńdeýshi kásiporyndar qýatynyń artýyna QR AShM-nyń ótken jyly tiri mal eksportyna moratorıı jarııalaýy oń áserin tıgizdi. Bul shara maldyń elden jappaı shyǵarylýyn toqtatyp qana qoımaı, Prezıdenttiń tapsyrmasyna sáıkes daıyn ónim óndirisiniń kólemin ulǵaıtýǵa múmkindik berdi», - deıdi mınıstrlikten.

Aıta keteıik, agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasy aıasynda et óńdeýshiler kelesideı qoldaý sharalary kórsetiledi:

1) jumys istep turǵan zaýyttardy jańǵyrtýǵa jáne jańa zaýyttardy salýǵa ınvestıtsııalyq salymdardyń bir bóligin óteý (25% deıin);

2) aınalym jáne negizgi quraldarǵa arnalǵan nesıeler boıynsha syıaqynyń paıyzdyq mólsherlemesin sýbsıdııalaý;

3) «Qarapaıym zattar ekonomıkasy» baǵdarlamasy sheńberinde, onyń ishinde et jáne qus etin óndirýshilerge jeńildikpen nesıe berý qarastyrylǵan.

Sonymen qatar, QR AShM ógizshelerdi et óńdeý kásiporyndaryna tapsyrý kezinde fermerlerdi sýbsıdııalaý sharalaryn engizdi. Mal ósirýshiler memleketten qosymsha bir keli tiri salmaq úshin 200 teńgeden ala alady.