Qazaqstanda búırek aýrýlaryn emdeý standarty jańartyldy
ASTANA. KAZINFORM- Qazaqstanda búırek aýrýlaryn erte anyqtaýǵa, ýaqtyly emdeýge, sondaı-aq dıalız ben búırek transplantatsııasynyń qoljetimdiligin arttyrýǵa baǵyttalǵan nefrologııalyq kómek kórsetý standarty jańartyldy.
QR Densaýlyq saqtaý mınıstrligi baspasóz qyzmetiniń habarlaýynsha, jańa standart patsıenttiń emhanadaǵy dıagnostıkadan bastap, mamandandyrylǵan em alýǵa, dıalızge jáne medıtsınalyq kórsetilimder boıynsha búırek transplantatsııasyna deıingi biryńǵaı baǵytyn qarastyrady.
Elimizde 14 myńnan astam patsıent dıalızdik em qabyldap júr. Bul baǵytta Respýblıkalyq nefrologııa ortalyǵy jáne Transplantattaý men joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyq jumys isteıdi.
Jańartylǵan standartty talqylaý jáne nefrologııa salasyn damytý máseleleri Aqtaýda ótken Ortalyq Azııa nefrologtarynyń kongresinde qaraldy. Jıynǵa Qazaqstan, AQSh, Italııa, Polsha, Túrkııa, Ázerbaıjan jáne Belarýs elderinen 310 maman qatysty.
Sarapshylar búırek aýrýlaryn dıagnostıkalaý men emdeýdiń zamanaýı ádisterin, dıalız qyzmetin jáne búırek transplantatsııasyn damytý máselelerin talqylady.
-Bizdiń mindetimiz – búırek aýrýlaryn erte kezeńde anyqtap, emniń úzdiksizdigin qamtamasyz etý. Osy maqsatta medıtsınalyq kómek kórsetý standarttaryn jetildirip, mamandandyrylǵan ortalyqtardy damytyp, medıtsına kadrlaryn daıarlap jatyrmyz. Búginde rezıdentýrada 50-den astam bolashaq nefrolog bilim alyp jatyr. Sonymen qatar 2026–2027 oqý jylynda taǵy 12 maman daıarlaý josparlanǵan, – dep atap ótti QR Densaýlyq saqtaý mınıstrligi Medıtsınalyq kómekti uıymdastyrý departamentiniń statsıonarlyq jáne statsıonardy almastyratyn medıtsınalyq kómek basqarmasynyń basshysy Maıra Abdrazaq.
Tsıfrlandyrý da dárigerlerdiń múmkindikterin keńeıtedi. Qalyptastyrylyp jatqan E-Densaulyq júıesi mamandarǵa patsıenttiń qaı óńirde nemese qaı medıtsınalyq uıymda em alǵanyna qaramastan, onyń medıtsınalyq tarıhyna qol jetkizýge múmkindik beredi.
Kongress qorytyndysy boıynsha erte dıagnostıkalaýǵa, mamandar daıarlaýǵa jáne emniń qoljetimdiligin arttyrýǵa basymdyq bere otyryp, nefrologııalyq qyzmetti damytýdyń salalyq baǵdarlamasyn ázirleý usynyldy.
Densaýlyq saqtaý mınıstrliginiń negizgi basymdyǵy – búırek aýrýlaryn ýaqtyly anyqtaý, olardyń údeýin baıaýlatý jáne patsıentterge sapaly medıtsınalyq kómek kórsetýdi qamtamasyz etý.
Aıta keteıik, Qazaqstanda tórt myńnan astam adam búırek aýystyrý kezeginde tur.
