Qazaqstanda BUU Ýnıversıtetiniń jańa ınstıtýty ashylady
ASTANA. KAZINFORM – Qazaqstanda BUU Ýnıversıtetiniń jańa ınstıtýty ashylady. Bul týraly Strategııalyq seriktesterdiń III halyqaralyq forýmynda Birikken Ulttar Uıymy Bas hatshysynyń orynbasary - BUU Ýnıversıtetiniń rektory professor Tshılıdzı Marvala aıtty.
- Qazaqstandaǵy ǵalym Japonııadaǵy, Afrıkadaǵy jáne Eýropadaǵy áriptesterimen klımatqa beıimdelý nemese jasandy ıntellekt boıynsha birlesip jumys isteı alýy tıis. Jas zertteýshi jetistikke jetý úshin óz elinen birjola ketý kerek dep oılamaı-aq jahandyq ǵylymı jelilerge qatysa alýy kerek. Biz «mıdyń syrtqa aǵylýynan» «aqyl-oı aınalymyna» kóshýimiz qajet. Al Qazaqstan osy jańa modeldi qalyptastyrýǵa atsalysý úshin óte qolaıly orynda tur. Qazaqstan Eýropa men Azııa arasynda erekshe mańyzdy pozıtsııany ıelenedi. Biraq onyń múmkindigi qazirgi bilim ortalyqtary arasyndaǵy jaı ǵana kópir bolýdan áldeqaıda joǵary. Qazaqstannyń derbes bilim ortalyǵyna aınalý áleýeti zor, - dedi ol.
Onyń paıymynsha, eldiń tsıfrlandyrý, energetıkalyq aýysý salasyndaǵy tájirıbesi jáne Ortalyq Azııa betpe-bet kelip otyrǵan ekologııalyq syn-qaterler jahandyq mańyzy bar zertteýler júrgizýge múmkindik beredi.
- Sondyqtan halyqaralyq yntymaqtastyq bilimniń tek bir baǵytta ǵana jyljymaıtynyn moıyndaýy tıis. Qazaqstan men Ortalyq Azııada ázirlengen sheshimder Afrıka úshin ózekti bolýy múmkin. Afrıkada jasalǵan ınnovatsııalar Azııadaǵy máselelerdi sheshýge úles qosa alady. Azııada júrgizilgen zertteýler Eýropadaǵy saıasatqa negiz bola alady. Shynaıy halyqaralyq yntymaqtastyq dál osyndaı. Bul rette BUU Ýnıversıtetiniń atqaratyn róli zor. BUU Ýnıversıteti — ári joǵary oqý orny ári BUU júıesiniń bir bóligi. Sondyqtan bizdiń jaýapkershiligimiz - tek bilim jasaý ǵana emes, BUU men oǵan múshe memleketter sheshýge umtylyp otyrǵan máselelermen zertteýlerdi ushtastyra otyryp, bilimdi adamzat ıgiligine jumyldyrý, - dedi ol.
Mártebeli meıman BUU Ýnıversıtetiniń Qazaqstanmen qarym-qatynasyndaǵy mańyzdy beleske toqtaldy.
- Osy sapar aıasynda biz dál osynda, Qazaqstanda jáne Ortalyq Azııada tuńǵysh ret BUU Ýnıversıtetiniń jańa ınstıtýtyn qurý jolynda naqty qadam jasap otyrmyz. Men úshin bul jaı ǵana ınstıtýtsıonaldyq keńeıýden áldeqaıda mańyzdy. Bul — Qazaqstanǵa degen berik senim men beıildilik. Bul — Ortalyq Azııaǵa degen beıildilik. Bul bilimniń jahandyq arhıtektýrasynyń ózi budan da jahandyq sıpatqa ıe bolýy tıis degen senimimizdi kórsetedi. Bizdiń maqsatymyz — jasandy ıntellekt aınalamyzdaǵynyń bárin ózgertip jatqan ýaqytta Qazaqstannyń zııatkerlik áleýeti men basymdyqtaryn BUU Ýnıversıtetiniń zertteý jelilerimen, sondaı-aq búkil álemdegi ǵalymdarmen jáne ınstıtýttarmen baılanystyrý, - dedi Tshılıdzı Marvala.
Qazaqstan BUU alańynda AI-Quryltai platformasyn tanystyrǵanyn jazǵan edik.