Qazaqstanda BUU turaqty damý maqsattary qalaı iske asyp jatyr
Turaqty damý maqsattary jónindegi úılestirý keńesiniń 7-shi otyrysynda BUU-nyń TDM salasyndaǵy Qazaqstannyń ulttyq ındıkatorlaryn ózektendirý máseleleri talqylandy, dep habarlaıdy primeminister.kz.
QR Premer-Mınıstri Álıhan Smaıylovtyń tóraǵalyǵymen ótken talqylaýǵa ortalyq memlekettik organdardyń basshylary, BUU, BUUDB jáne Eýropalyq odaq ókilderi qatysty.
Búgingi tańda ulttyq ındıkatorlarǵa tekseris júrgizilip, olardyń keıbiriniń mártebesin qaıta qaraý qajettigi atap ótildi.
Atap aıtqanda, ózekti ındıkatorlar sanatyna barlyq vaktsınalarmen ımmýndaýmen qamtylǵan azamattardyń úlesi, áıelderge qatysty turmystyq zorlyq-zombylyq faktileri, parnıktik gazdar shyǵaryndylarynyń kólemi boıynsha jáne t.b. kórsetkishterdi qosý usynylady.
Bul Qazaqstannyń Turaqty damý maqsattaryna qol jetkizý jónindegi jumysynyń tıimdiligin arttyrýǵa múmkindik beredi.
Sonymen qatar otyrysta TDM ındıkatorlaryn QR Strategııalyq baǵdarlamalary men qujattaryna qosý, sondaı-aq olardy respýblıka óńirlerinde lokalızatsııalaý jáne engizý máseleleri talqylandy.
Álıhan Smaıylov turaqty damý maqsattaryna qol jetkizý úzdik halyqaralyq standarttardy engizý arqyly halyqtyń ómir súrý sapasyn arttyrýǵa baǵyttalǵanyn atap ótti.
«Ótken jyldyń qyrkúıek aıynda Memleket basshysy Qasym-Jomart Toqaev Turaqty damý maqsattary jónindegi BUU sammıtine qatysty. Prezıdent óz sózinde TDM-ǵa qol jetkizý biz úshin ulttyq basymdyq bolyp tabylatynyn atap ótti. Sol sebepti biz neǵurlym ádiletti jáne ornyqty álemge umtylý jolynda múshe memleketterdiń barlyǵymen yntymaqtasýǵa árqashan daıynbyz», — dedi Premer-Mınıstr.
Úkimet basshysy TDM boıynsha osyndaı sessııa Astanadaǵy Halyqaralyq ekonomıkalyq forým aıasynda da ótkizilgenin eske saldy.
Sondaı-aq jekelegen óńirlerde TDM-ny lokalızatsııalaý boıynsha semınarlar ótti.
Talqylaý qorytyndysy boıynsha Úılestirý keńesi 2024 jylǵa arnalǵan TDM-ny iske asyrý jónindegi sharalar josparyn bekitti.
Premer-Mınıstr memlekettik organdarǵa onyń ýaqytyly jáne sapaly oryndalýyn qamtamasyz etýdi tapsyrdy.
«Búgin biz naqty tapsyrmalar qoıdyq, olardy jyl boıy kezeń-kezeńmen oryndaý kerek», — dep túıindedi Úkimet basshysy.
Aıta keteıik, Birikken Ulttar Uıymy 2015 jyly jalpyǵa birdeı kedeılik pen teńsizdikti joıý, qorshaǵan ortany qorǵaý, ǵalamshar halqynyń órkendeýin qamtamasyz etý jónindegi is-qımyldarǵa shaqyrý maqsatynda Turaqty damý maqsattaryn qabyldady.
Barlyǵy 17 baǵyt anyqtaldy, olardy iske asyrý ekonomıka men áleýmettik ómirdiń negizgi salalarynyń damýyna yqpal etpek.
BUU jáne QR Úkimeti ókilderi TDM jetistikterine monıtorıng júrgizip, turaqty baqylaýda ustap otyr.
