Qazaqstanda BUU-nyń gýmanıtarlyq qoımalary qurylýy múmkin
Eske salaıyq, jalpy otyrysta «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyqty qurý týraly kelisimdi ratıfıkatsııalaý týraly» Zańy qabyldanǵan bolatyn. Mınıstr mindtin atqarýshy V. Bojkonyń aıtýynsha, Almaty qalasynda qurylatyn Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyqqa BUU Aımaqtyq qurylymdary, Germanııanyń, Japonııanyń jáne basqa da elderdiń halyqaralyq yntymaqtastyq agenttikteri qyzyǵýshylyq tanytyp otyr. Kóptegen uıymdar atalmysh ortalyqty tótenshe jaǵdaılar salasyndaǵy jobalardy júzege asyratyn alań retinde qarastyrýda. «Sonymen qatar, BUU-nyń belsendi qoldaýy nátıjesinde qurylatyn Tótenshe jaǵdaılar jónindegi Ortalyq Qazaqstan Respýblıkasynyń Prezıdenti N. Nazarbaevtyń Almaty qalasynda kópjaqty dıplomatııalyq hab qurý týraly júktegen tapsyrmalaryn da oryndaýdy maqsat tutady. Al Ortalyqtyń jumysy aıasynda BUU-nyń Qazaqstandaǵy gýmanıtarlyq qoımalaryn qurý máselesi qarastyrylady. Ondaı qoımalar Ortalyq Azııa óńirindegi memleketterge gýmanıtarlyq kómekter kórsetýge baǵyttalady, al ol qoımalardy materıaldyq qorlarmen tolyqtyryp otyrý qazaqstandyq taýar óndirýshilerge júktelýi de múmkin», - deıdi V. Bojko.
