Qazaqstanda BUU-nyń 80 jyldyǵyna arnalǵan mýral ashyldy

ALMATY. KAZINFORM — Qazaqstannyń Shymbulaq taý-shańǵy kýrortynda, teńiz deńgeıinen 3200 metr bıiktikte, Birikken Ulttar Uıymynyń 80 jyldyǵyna arnalǵan aýqymdy mýraldyń tanystyrylymy ótti. Bul týraly BUU resmı saıty jazdy.

Qazaq sýretshisi Ádil Áýbákirov biregeı týyndysyn BUU-na arnap saldy. Týyndy álemdegi eń iri bıik taýly kórkem ınstallıatsııa retinde baǵalanyp otyr.

Pannonyń kólemi — 36×6 metr. 

BUU-nyń Ǵalamdyq kommýnıkatsııalar departamentiniń ókili Vlastımıl Samek ashylý saltanatynda sóılegen sózinde atap ótti:

— Bul týyndy BUU-nyń tapsyrysy boıynsha emes, qoǵamnyń, jeke sektor men jergilikti seriktesterdiń bastamasymen jasaldy. Shymbulaqtaǵy bul óner týyndysy — ınnovatsııalar adamdarǵa qyzmet etetin, tabıǵat qorǵalatyn jáne eshkim progresten shet qalmaıtyn beıbit álem qurýǵa shaqyrý.

Sharaǵa qoǵamdyq uıymdar men mádenıet jáne ǵylym ókilderi, dıplomatııalyq korpýs pen BAQ qatysty. Qonaqtarǵa jobanyń tujyrymdamasy men tarıhy tanystyrylyp, kýrort mamandary bıik taýly jaǵdaıda týyndyny júzege asyrý úshin qoldanylǵan tehnıkalyq sheshimder týraly aıtyp berdi.

Sýretshi Ádil Áýbákirov óz sózinde týyndynyń ıdeıasy kóshpelilerdiń kórkem jáne sımvoldyq murasyn qazirgi zaman turǵysynan qaıta paıymdaýǵa negizdelgenin atap ótti:

— Árbir bólik belgili bir estelikti beıneleıdi. Barlyǵy birige kele bizdi birtutas etetin nárse — tabıǵatqa, kórshilerge, álemge degen qurmet týraly áńgimeleıdi. Men úshin bul — BUU 80 jyl boıy qorǵap kele jatqan qundylyqtar mozaıkasy, sonymen qatar bolashaqqa kóz tikken kóshpendi kózqarasy.

Ádil Áýbákirovtiń mýraly BUU-ǵa arnalǵan álemdegi eń iri bıik taýly kórkem ınstallıatsııa retinde tanyldy. Joba kúrdeli klımattyq jaǵdaıda — aýa qysymynyń tómendigi, temperatýranyń kúrt aýytqýy jáne qatty jel sekildi tabıǵı kedergilerge qaramastan júzege asyryldy. Arnaıy tehnıkalyq sheshimderdiń arqasynda qurylym qorǵaý jáne kórkemdik qyzmetin qatar atqarady.

Aıta keteıik, Petropavlda Abaıǵa arnalǵan mýral paıda boldy.