Qazaqstanda BUU agrouıymynyń ashylýy: Investıtsııa kólemi qandaı

ASTANA. QazAqparat - Eki jylda BUU Azyq-túlik jáne aýyl sharýashylyǵy uıymy (FAO) Qazaqstanda quny 130 mln dollar bolatyn birqatar jobany iske asyrmaq. Bul týraly Májilistiń jalpy otyrysynda QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev málim etti, dep habarlaıdy QazAqparat tilshisi.

«Búginge deıin FAO Qazaqstanda jalpy granttyq qarjylandyrý somasy 65,5 mln dollardy quraıtyn 70-ten astam jobany júzege asyrdy. Onyń ústine, 2018-2019 jyldary FAO quny 130 mln dollardy quraıtyn taǵy 7 jobany iske asyrýdy josparlap otyr», - dep atap ótti Ómirzaq Shókeev.

Jalpy FAO týraly aıtar bolsaq, uıym - ashtyqqa qarsy kúres jónindegi halyqaralyq áreketterdi basqaratyn Birikken Ulttar Uıymy júıesiniń agenttigi. FAO shtab-páteri Rımde (Italııa) ornalasqan. Shyǵys Eýropa, Ortalyq Azııa jáne TMD aımaǵy FAO-nyń Býdapeshttegi aımaqtyq keńsesinen basqarylady. Qazaqstanmen áriptestigi 1997 jyly FAO-ǵa múshe bolǵannan beri damyp keledi.

Budan buryn habarlanǵandaı, Májilistiń jalpy otyrysynda «QR Úkimeti men BUU-nyń Azyq-túlik jáne aýyl sharýashylyǵy uıymy (FAO) arasyndaǵy FAO-nyń Qazaqstandaǵy Baılanys jáne áriptestik jónindegi bıýrosyn qurý týraly kelisimdi ratıfıkatsııalaý týraly» zań jobasy maquldandy.

Bul Bıýro ýákiletti memlekettik organdardyń jaqyndyǵyn eskerip, agroónerkásiptik keshen salasynda kúndelikti tyǵyz jumys júrgizý úshin Astana qalasynda ornalasatyn bolady. Sondaı-aq BUU uıymdarynyń Habyn qurý jónindegi Memleket basshysynyń tapsyrmasynyń aıasynda keleshekte Almaty qalasynda fılıal ashylýy josparlanǵan.