Qazaqstanda buryn-sońdy bolmaǵan aýqymdy jol salý jumysy júrip jatyr - Asqar Mamın

Onyń aıtýynsha, bıyl osy baǵdarlama jobalaryn iske asyrýda 200 myń adam jumyspen qamtylady. Olar 4 myń shaqyrym jol qurylysymen jáne qaıta jańartýmen aınalysady. Taldyqorǵan-Óskemen, Qaraǵandy-Balqash-Qapshaǵaı, Qalbataý-Maıqapshaǵaı, Merke-Býryl-Baıtal, Úsharal-Dostyq, Aqtóbe-Astrahan, Uzynaǵash-Otar, Petropavl-Reseı shekarasy, Qostanaı-Denısovka syndy 2,6 myń shaqyrym jol paıdalanýǵa beriledi.

«Bıyl respýblıkalyq mańyzy bar joldardy paıdalanýǵa berý kólemi ótken jylǵy kórsetkishpen salystyrǵanda 4 ese artyq. Sonymen birge, jergilikti mańyzy bar 3,5 myń shaqyrym jol jóndeýden jáne qurylystan keıin paıdalanýǵa beriledi. Qazaqstan tarıhynda buryn-sońdy mundaı aýqymdy joldar salý boıynsha jumys júrgizilgen joq. Sondyqtan bizdiń mindetimiz - olardy tolyǵymen jáne ýaqytynda oryndaý. Sol sebepti, osy mindetterdi oryndaý úshin barlyq kúshti jumyldyrý qajet», - dep atap ótti Premer-Mınıstr Úkimettiń onlaın otyrysynda.

Osyǵan qaraı Asqar Mamın Indýstrııa jáne ınfraqurylymdyq damý mınıstrligine tapsyrmalar júktedi.

«Ákimdiktermen jáne Qazavtojolmen birlesip, osy jylǵa josparlanǵan jobalardy ýaqytynda iske qosýdy qamtamasyz etý kerek. Qurylys maýsymyn barynsha tımdi paıdalanýdyń mańyzy óte zor. Karantın jaǵdaıyna baılanysty keıbir eldi mekenderde nysandarǵa janar-jaǵarmaıdy, jol-qurylys materıaldaryn jáne tehnıkany kedergisiz jetkizý úshin «jasyl dálizdi» qamtamasyz etý qajet», - dedi ol.

Ekinshiden, joldardy sapaly deńgeıde kútip-ustaý úshin jáne bıýdjetke túsetin túsimderdi arttyrý úshin jyl sońyna deıin 5,7 myń shaqyrymdy quraıtyn joldardy aqyly júıege aýystyrý boıynsha jumystardy aıaqtaý qajet.

«Úshinshi, avtojoldardyń aýqymdy qurylysy otandyq qurylys materıaldaryn paıdalanýdy talap etedi. Sondyqtan, Indýstrııa mınıstrligine otandyq qurylys materıaldary óndirisi qýatyn barynsha iske qosýdy tapsyramyn», - dedi Asqar Mamın.

Buǵan deıin Premer-Mınıstr karantındik rejımdi birtindep jeńildetý jumystary jóninde pikir bildirgen edi.