Qazaqstanda býkmekerlik keńseler eki esege azaıdy

ASTANA. QazAqparat - Sońǵy 2,5 jylda Qazaqstanda býkmekerlik keńseler sany eki esege azaıdy, dep habarlaıdy QazAqparat Mádenıet jáne sport mınıstrligine silteme jasap.

Eger 2021 jyldyń basynda elimizde 38 býkmekerlik keńse bolsa, búginde olardyń sany - 16, al is júzinde jumys isteıtinderiniń sany – 12.

Mádenıet jáne sport mınıstrligi túsindirý arqyly jáne sot tártibimen býkmekerlik keńselerdiń sanyn azaıtý boıynsha jumys júrgizedi. Mysaly, sońǵy 3 jylda býkmekerlik keńseler 15 lıtsenzııany óz erkimen tapsyrdy.

Al osy jyldyń basynan sot sheshimimen 5 býkmekerlik keńse jabyldy, olardyń jumysy qoldanystaǵy zańnama normalaryna sáıkes kelmedi. Qazirgi ýaqytta taǵy 3 býkmekerlik keńsege qatysty lıtsenzııalardyń kúshin joıý jumysy júrip jatyr.

Qazaqstandaǵy oıyn bıznesi sýbektileriniń jalpy sany da kemip jatyr. Sońǵy 5 jylda olar 2,5 ese azaıdy. Eger 2018 jyly 97 bolsa, bıyl olardyń sany 38 birlikti quraıdy.

«Mádenıet jáne sport mınıstrligi býkmekerlik keńseler men oıyn bıznesiniń basqa da nysandarynyń zań normalaryn saqtaýyn muqııat qadaǵalaıdy. Máselen, 2023 jyldyń basynan mınıstrlik sot tártibimen oıyn bıznesi salasyndaǵy 7 lıtsenzııanyń qoldanylýyn toqtatty. Osyǵan uqsas taǵy 7 uıymǵa qatysty jumys atqarylyp jatyr. Sondaı-aq ınternette de monıtorıng júrgiziledi. Bıyl 3670 zańsyz onlaın-kazıno buǵattaldy»,- dedi QR Mádenıet jáne sport vıtse-mınıstri Erjan Erkinbaev.