Qazaqstanda buqaralyq sportty damytýdyń jańa strategııasy ázirlenedi
NUR-SULTAN. QazAqparat – «QazAqparat» dırektorlar keńesiniń múshesi, MSM jobalyq keńsesiniń ahýaldyq-taldaý ortalyǵynyń jetekshisi Qambar Omarov «Qazaqstan sportyn transformatsııalaý» jobalyq keńsesi jumysynyń jeti negizgi baǵytyn atady, dep habarlaıdy QazAqparat tilshisi.
Aıta keteıik, jaqynda elimizde «Qazaqstan sportyn transformatsııalaý» jobalyq keńsesi quryldy.
Jobalyq keńseni basqarýǵa Qambar Omarov taǵaıyndaldy.
«Transformatsııa boıynsha jobalyq keńse sporttaǵy túrlenýdiń tolyq tsıklin júrgizedi, ıaǵnı memlekettik deńgeıde basqarý júıesinen aýyldyq okrýgterge deıin. Sonymen qatar keńse Ulttyq Olımpıadalyq komıtetimen, Ulttyq Paralımpıada komıtetimen, federatsııalarmen ózara is-qımylda bolady, sondaı-aq jappaı balalar sporty men joǵary jetistik sportyn damytý salasynda el úshin strategııalyq maqsattardy ázirleıdi», - dedi Qambar Omarov Ortalyq kommýnıkatsııalar qyzmetinde.
Onyń aıtýynsha, jobalyq keńse óz jumysyn saladaǵy tyńǵylyqty SWOT- taldaýdan bastaıdy jáne strategııalyq baǵyttardyń negizgi tizimin qurady. Munymen qosa, jobalar toptamasy qurylyp, basqarý júıesin jetildirýmen aınalysyda, sondaı-aq Mádenıet jáne sport mınıstrligimen birlese buqaralyq sportty damytýdyń jańa strategııasyn daıarlaýǵa qatysady.
Transformatsııa boıynsha toptyń bastapqy taldaýdyń negizinde komanda jeti strategııalyq baǵytty belgilegenine toqtalǵan Q. Omarov, endi osy baǵyttar boıynsha jumys isteý kerek ekenin atap ótti.
«Birinshiden, balalar sportyn damytý eskerilgen. Ekinshisi – basqarý júıesiniń transformatsııasy, úshinshisi – kadrlyq saıasatty jetildirý, tórtinshisi – zańnamalyq ári retteý bastamalary, besinshisi – medıtsınalyq-bıologııalyq jáne farmatsevtıkalyq qamtamasyz etý, altynshysy – sport ınfraqurylymyn damytý, jetinshisi – halyqaralyq yntymaqtastyq. Strategııalyq baǵyttardyń árqaısysy boıynsha toptar Jol kartasyn ázirleıdi», - dedi ol.
