Qazaqstanda býhgalterlik qyzmet quny qansha turady
ASTANA. KAZINFORM — Qazaqstanda esepshi mamannyń qyzmetine suranys artty, dep habarlaıdy Kazinform agenttiginiń tilshisi.
Býhgalterlik qyzmet quny kásibı mamanǵa, jumys aýyrlyǵyna, onyń kólimi men oryndaý merzimine baılanysty ártúrli bolyp keledi. Eńbek ótili mol esepshi kóp aqy surýy múmkin, al jas mamannyń tarıfi ózge. Sondyqtan esepshi qyzmetine júgingen kezde aqshasyna ǵana emes, jumys sapasyna basa mán berý kerek.
Bir rettik keńes úshin kásipkerler bir ǵana tólem jasaıdy. Al býhgalterlik jáne salyq esebin júrgizse, aı saıyn jalaqy tóleıdi. Saralaý kezinde iri fırmalardy emes, tanymal saıttardaǵy eń arzan qyzmet túrin salystyryp kórdik.
Elimizde esepshi qyzmeti Astana men Almatyda qymbat turady. Bir rettik keńes alý munda kem degende 5 myń teńge dep bekitilgen. Jeke kásipkerdiń býhgalterlik esebin júrgizý eki qalada da 18 myń teńgeden bastalady, ol JShS esebine 55 myń teńgeden astam aqy suraıdy.
Sodan keıingi orynda Aqtóbe, Atyraý jáne Kókshetaý tur. Munda eń arzany 5 myń teńgeden bastalyp, 9 myń teńgege deıin jetedi. Elimizdiń batysyndaǵy eki qalada jeke kásipkerdiń býhgalterlik esebin júrgizý qyzmeti 10 myń teńgeden, al JShS-ne 20 myń teńgeden bastalady. Kókshetaýda JK-ge qyzmet 5 myń, JShS-ne qyzmet 15 myńge jáne odan joǵary bolyp tur.
Taldyqorǵan, Túrkistan, Óskemen, Petropavlda qyzmet quny arzan da, qymbat ta emes. Jetisý oblysynda keńes alý quny 4-8 myń teńge turady. Al jeke kásipkerdiń qyzmetin júrgizý 10 myń teńge, JShS-in júrgizý 30 myń teńgeden bastalady.
Elimizdiń ońtústiginde de esepshi qyzmeti shamalas. Al keńes alý quny 3-8 myń teńge turady.
ShQO men SQO-da bir ret qana keńes alý quny 3 myń teńgeden bastalyp, 5 myń teńgege deıin jetedi. Al jeke kásipker men JShS-niń býhgalterlik esebin júrgizý quny 10-15 myń teńge turady.
Qaraǵandy, Jezqazǵan, Shymkent, Aqtaý, Qonaev, Qostanaı, Pavlodar men Oralda býhgalterlik qyzmet quny ózgelerge qaraǵanda tómen. Bul qalalarda esepshiniń túrli qyzmeti 2 myń teńgeden bastalyp, 8 myń teńgege deıin jetedi. Tek býhgalterlik esep men salyq esebin júrgizý qunynda ózgeshelik bar.
Jeke kásipkerge qyzmet kórsetý 3-5 myń teńge aralyǵynda turady. Al Shymkentte bul qyzmet baǵasy 10 myń teńgeden bastalady. JShS-niń esebin júrgizý bul qalalarda 10-15 myń teńge aralyǵynda turady. Tek Oral men Shymkentte aıyna 7 myń jáne 30 myń teńge suraıdy.
Qyzylorda, Semeı jáne Tarazda býhgalterlik qyzmet quny tómen. Tanymal saıttarda keńes alý quny 2-5 myń teńge dep kórsetilgen. Qyzylordada jeke kásipkerdiń esebin júrgizý qyzmeti 5 myń, JShS-ine qyzmet kórsetý 10 myń teńgeden bastalady. Semeıde JK-ge 3 myń, JShS-ge 5 myń teńge suraıdy. Tarazda JK esebin júrgizý 7-8 myń, JShS-ine qyzmeti kórsetý 12 myń teńge turady.
Ótken aptada elimizde notarıýs qyzmeti qansha turatyny týraly jazǵan edik.