Qazaqstanda búgin – Eńbek kúni
Búgin, 24 qyrkúıek elimizde Eńbek kúni atalyp ótedi, dep habarlaıdy QazAqparat tilshisi.
Bul mereke 2013 jyly jumysshy mamandyqtarǵa qurmet kórsetý dástúrin jańǵyrtý jáne erte jastan eńbektiń mańyzdylyǵyn túsiný maqsatynda azaqstan Respýblıkasy Prezıdentiniń 2013 jylǵy 22 qarashadaǵy №698 Jarlyǵymen bekitilgen. Eńbek kúni qyrkúıektiń sońǵy jeksenbisi atap ótiledi.
Elimizde eńbek adamynyń bedelin arttyrý maqsatynda «Eńbek ardageri» medali men «Qazaqstannyń Eńbek Eri» joǵary erekshelik belgisi bekitilgen.
«Eńbek ardageri» medali jumys ótili 40 jyldan asqan, onyń 10 jylyn bir salada istegen, sonymen qatar eńbek qyzmetinde eń úzdik nátıjege qol jetkizgen, zeınet jasyna jetken ekonomıkanyń túrli salalarynyń jumysshylary men tulǵalaryna beriledi.
«Qazaqstannyń Eńbek Eri» joǵary erekshelik belgisi elimizdiń ekonomıkalyq jáne áleýmettik-gýmanıtarlyq damýynda aıryqsha tabysqa jetken azamattarǵa tabystalady. «Qazaqstannyń Eńbek Eri» ataǵyn alǵan tulǵa Altyn juldyz aıryqsha erekshelik belgisi men «Otan» ordenine ıe bolady. 2016 jyldan bastap elimizde jyl saıyn Eńbek kúnine jáne «Eńbek adamyn» marapattaýǵa arnalǵan «Eńbek joly» respýblıkalyq konkýrsy ótkiziledi. Baıqaý atalymdarynyń biri – «Jumys isteıtin jastardyń úzdik tálimgeri». Bul atalymǵa laýreattardyń árqaısysynyń 20 jyldan astam eńbek ótili bar. Olar osy jyldardyń ishinde júzdegen jas mamandy oqytty.
Astanada Eńbek kúnine arnalǵan forým aıasynda jastar arasynda jumysshy mamandyqtaryn nasıhattaýǵa jáne eńbek tárbıesin aldyńǵy orynǵa qoıǵan áýletterdiń kópjyldyq dástúrin nyǵaıtýǵa baǵyttalǵan «Eńbek joly» respýblıkalyq konkýrsynyń óńirlik kezeńiniń jeńimpazdary marapattaldy.
Memleket basshysy Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty Qazaqstan halqyna bıylǵy Joldaýynda el azamattaryn Qazaqstandy qýatty ári tabysty elge aınaldyrý úshin eńbek etýge jáne ózin ózi damytýǵa shaqyrǵan bolatyn.
«Qazaqstan – bizdiń jalǵyz ǵana Otanymyz. Onyń irgesi berik, keregesi keń, tórt qubylasy túgel bolýy – óz qolymyzda. Babalardan mıras bolǵan ulan-ǵaıyr jerdi qorǵaý, ony órkendetý – bizdiń perzenttik paryzymyz. Men elimizdiń árbir azamatyn osy qasıetti paryzǵa adal bolýǵa shaqyramyn. Berekeli birligimizdi saqtap, tabandy eńbek etsek, Otanymyzdy kórkeıtip, urpaqqa damyǵan memleket retinde tabystasaq, babalar amanatyna adaldyq degen – osy!», - dedi edi Prezıdent.
Elimizde Eńbek kúnin kóptegen kásiporyn men eńbek ujymdary atap ótedi. Merekege oraı túrli mýzykalyq kontsertter, úzdik eńbek tálimgeri, úzdik jas jumysshy ataqtaryna arnalǵan taqyryptyq baıqaýlar jáne basqa da is-sharalar ótedi.
