Qazaqstanda búgin teleradıohabar taratý qyzmeti toqtap tur
ASTANA. QazAqparat - 2016 jyldyń 18 sáýirinde saǵat 03:00-den 17:00-ge deıin QR teleradıohabar taratý salasyndaǵy Ulttyq operatory - «Qazteleradıo» AQ jerseriktik jáne efırlik jelilerdiń tehnıkalyq qondyrǵylarynda qyzmetti toqtata turyp, josparlyq-aldyn alý jumystaryn júrgizedi, dep habarlaıdy kompanııanyń baspasóz qyzmeti.
Qazaqstan Respýblıkasynyń Investıtsııalar jáne damý mınıstrligi bekitken «Ulttyq operator taratatyn erkin qoljetimdiktegi tele, radıoarnalardyń tizimin bekitý týraly» 2016 jyldyń 23 aqpanyndaǵy №213 Buıryqtyń negizinde 2016 jyldyń 18 sáýirinde saǵat 03:00 ben 17:00 aralyǵynda «Qazteleradıo» AQ jerseriktik jáne efırlik jelilerdiń tehnıkalyq qondyrǵylarynda qyzmetti jabý arqyly, sondaı-aq erkin qoljetimdiktegi otandyq telearnalardyń aqparattyq jyldamdyǵyn arttyrý, «OTAU TV» jerseriktik teleradıohabar taralym baǵdaralamalar paketindegi telearnalar quramyn ózgertý jáne olardy «Intelsat 904»/«KazSat-3» ǵarysh apparattarynyń transponderlerine qaıta úlestirý boıynsha josparly-aldyn alý jumystaryn júrgizedi.
- «Qazteleradıo» AQ jerseriktik jáne efırlik jelilerdiń tehnıkalyq qondyrǵylarynda qyzmetti jabý arqyly josparlyq-aldyn alý jumystaryn toqsan saıyn júrgizip otyrady. Bul jumystar sapaly teleradıohabar taratý úshin qajet. Ári toqsandyq josparlyq-aldyn alý jumystar qyzmetti uzaq ýaqytqa óshirýge múmkindik beredi, bul ýaqytta tehnıkalyq qondyrǵylardy jetildirý boıynsha qosymsha is-sharalar júrgiziledi. Josparlyq-aldyn alý jumystary kezinde dybystyq súıemeldeýdi avtomattyq retteý júıesin engizý, arnalyq jospardy ózgertý jumystary, sondaı-aq jerseriktik jeliniń aqparattyq jyldamdyǵyn arttyrý arqyly habar taratý sapasyn arttyrý boıynsha is-sharalar josparlanǵan. Jerseriktik jeli Almaty, Astana jáne Oral qalalarynda ornalasqan úsh tehnıkalyq ortalyqtan turady, - dedi «Qazteleradıo» AQ Teleradıohabar taratý jelilerin paıdalaný boıynsha Atqarýshy dırektor Temirjan Qulbaev.
Kompanııa ókilderiniń aıtýynsha, jańa arnalyq jospardy qabyldaǵaly beri keıbir jergilikti telearnalar respýblıka aýmaǵyna habar taratýǵa múmkindik aldy, al bul otandyq tele, radıoarnalardyń ary qaraı damýyna septigin tıgizbek. Sonymen qatar, 18 sáýirden bastap «OTAU TV» jerseriktik teleradıohabar taratý jelisindegi tele, radıoarnalardyń nýmeratsııasynda ózgerister bolady, bul ózgerister otautv.kz saıtynda jarııalanǵan.
