Qazaqstanda býbon obasynyń taralý qaýpi bar ma

NUR-SULTAN. QazAqparat – Qazaqstanda býbon obasynyń taralý qaýpi bar ma? Bul suraqqa OKQ-da ótken baspasóz máslıhatynda Densaýlyq saqtaý vıtse-mınıstri Ajar Ǵınııat jaýap berdi, dep habarlaıdy QazAqparat tilshisi.

Vıtse-mınıstrdiń aıtýynsha oba ókpe formasyna ótip ketpese býbon obasy adamnan adamǵa juqpaıdy. Atalyp ótkendeı, Qazaqstanda obanyń tabıǵı oshaqtary bar.

«Búkil eldegi obaǵa qarsy sanıtarlyq qyzmetter sanıtarlyq aldyn alý jumystaryn júrgizip, jaǵdaıdy baqylaýynda ustap otyr. Al Mońǵolııadan býbon obasyn qazaqstandyqtardyń juqtyrý yqtımaldyǵy tómen. Tek obanyń ókpe formasyn juqtyrǵan nemese onyń aýyr formasymen aýyrǵan adam bizdiń elge kelmeýi kerek», - dedi Ajar Ǵınııat.

Aıta keterligi Mońǵolııada býbon obasynyń taralýyna baılanysty karantın engizilgen bolatyn.