Qazaqstanda brýtsellez boıynsha 51 qolaısyz pýnkt tirkelgen
«Búgingi kúni respýblıka óńirleri veterınarııalyq preparattarmen jyldyq qajettiliktiń 96,2 paıyzymen qamtamasyz etildi. Veterınarııalyq preparattardy satyp alýda otandyq óndirýshilerge basymdyq berildi. Máselen, ótken jylǵy satyp alýda olardyń úlesi shamamen 70 paıyzdy quraǵan bolatyn. Mysaly, bıyl nodýlıarly dermatıt boıynsha preparattar tolyq kólemde otandyq Bıologııa jáne bıotehnologııalar máseleleri ǵylymı zertteý ınstıtýtynan satyp alyndy. Bul ótken jylǵa qaraǵanda 2,7 mlrd teńgeni únemdeýge múmkindik berdi. Qazirgi ýaqytta atalǵan ınstıtýttan jaqynda daıyndalǵan túıe sheshegine qarsy vaktsınany satyp alý josparlanyp otyr», - dedi mınıstr.
Onyń aıtýynsha, brýtsellez boıynsha qolaısyz pýnktterdi tirkeý serpini tómendeýde. Ótken jyly brýtsellezdi dıagnostıkalaý tetigi ózgerdi. Bul oń nátıje bergen mal basynyń sanyn 2019 jylǵy 5 aı ishindegi 32 myńnan 2020 jyldyń sáıkes kezeńinde 28 myń basqa deıin qysqartýǵa nemese 12,5 paıyzǵa tómendetýge múmkindik berdi.
«Bıylǵy 1 maýsymdaǵy jaǵdaı boıynsha brýtsellez boıynsha 51 qolaısyz pýnkt tirkelgen. Bul ótken jyldyń sáıkes kezeńine qaraǵanda 28 pýnktke az. 28,6 mln bas janýardyń barlyq túrin brýtsellezge zertteý kezinde 28,8 bas oń nátıje bergen nemese 0,1 paıyz brýtsellez juqtyrǵan mal anyqtaldy.
«Sonymen qatar bıyl ótken jyldyń sáıkes kezeńimen salystyrǵanda lısterıoz, anaerobty enterotoksemııa sııaqty janýarlardyń asa qaýipti aýrýlar sanynyń tómendeýi baıqalady. Sondaı-aq ótken jyldary tirkelgen sibir jarasy, Nıýkasl aýrýy, rınopnevmanııa sııaqty aýrýlar boıynsha salamattylyq saqtalýda. Mınıstrlik qabyldaǵan sharalardyń nátıjesinde bizdiń elimiz aýsyl, jylqy men shoshqanyń afrıkalyq obasy, qus tumaýy boıynsha salamatty el degen resmı halyqaralyq mártebege ıe. Shoshqanyń klassıkalyq obasy, kúıis qaıyratyn usaq mal obasy, sıyr qutyrmasy boıynsha salamatty el resmı halyqaralyq mártebesin alý boıynsha jumys júrgizilýde», - dedi mınıstr.