Qazaqstanda birlesken jobalardy iske asyrýǵa nıetti majarlyq kásipkerlerge tolyq qoldaý kórsetiledi - Prezıdent
ASTANA. KAZINFORM — Qazaqstan men Majarstannyń saýda jáne ekonomıkalyq baılanysty nyǵaıtýǵa zor áleýeti bar. Bul týraly Aqordada elimizge resmı saparmen kelgen Majarstan Prezıdenti Tamash Shýıokpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Qazaqstan men Majarstan ózara túsinistik pen tereń tarıhı tamyrlastyqqa negizdelgen ózara qarym-qatynasty bólisedi. Majarstannyń eýropalyq elderdiń ishinde alǵashqylardyń biri bolyp Qazaqstan táýelsizdigin moıyndaýyn joǵary baǵalaımyz. Osydan 11 jyl buryn strategııalyq kelisimge qol qoıa otyryp, yntymaqtastyǵymyzdy nyǵaıttyq. Majarstan Qazaqstanmen mundaı deklaratsııaǵa qol qoıǵan birinshi ortalyqeýropalyq el boldy. Búginde saıası dıalogymyz buryn-sońdy bolmaǵan qýatqa ıe, - dedi Memleket basshysy.
Prezıdent eki eldiń arasyndaǵy saýda jáne ekonomıkalyq baılanysty myǵym dep baǵalap, odan ary damytý úshin zor áleýetke ıe ekenin aıtty.
- Ótken jyly eki jaqty taýar aınalymy 200 mln dollarǵa jýyqtady jáne osy jyldyń 8 aıynda 22 paıyzǵa ósti. Qazirgi ýaqytta Qazaqstan aýmaǵynda 35 majarlyq kompanııa jumys istep jatyr. Olar Qazaqstan ekonomııkasyna Majarstannan 400 mln dollardan astam ınvestıtsııa ákeldi. Qazirdiń ózinde aýyl sharýashylyǵy, jańartylatyn energııa kózderi, densaýlyq saqtaý, qarjy, logıstıka syndy salalarda quny 700 mln dollardan asatyn 20 birlesken jobany iske qostyq. Degenmen, áli de qozǵalmaǵan áleýettiń mol ekenin túsinemiz. Sondyqtan bar múmkindikterdi zerdeleý jáne paıdalaný úshin tıimdi sharalar qabyldaý qajet, - dedi Qasym-Jomart Toqaev.
Prezıdent eki el arasynda energetıka, kólik jáne logıstıka, qarjy, tsıfrlandyrý, jasandy ıntellekt, farmatsevtıka salalarynda yntymaqtastyq úshin múmkindik bar ekenin aıtty.
- Majarlyq kásipkerler Qazaqstanda birlesken jobalardy júzege asyrý barysynda bizdiń tolyq qoldaýymyzǵa senim arta alady, - dedi Memleket basshysy.
Aıta keteıik, Aqordada Memleket basshysy Qasym-Jomart Toqaev elimizge resmı saparmen kelgen Majarstan Prezıdenti Tamash Shýıokty qarsy aldy.