Qazaqstanda birqatar shaı ónimine qoıylǵan shekteý alynyp tastaldy
ASTANA. KAZINFORM — Sanıtarııalyq-epıdemıologııalyq baqylaý komıteti «Orda Trade Astana» JShS-niń birqatar shaı ónimin ákelý men ótkizýge qoıylǵan shekteýlerdiń kúshin joıdy.
Vedomstvonyń baspasóz qyzmetiniń málimetine sáıkes atalǵan sheshim ónimniń óndirisi men satylymynyń barlyq kezeńi baqylaýda bolǵanyn rastaıtyn qujattar men sanıtarııalyq-epıdemıologııalyq saraptama nátıjeleri negizinde qabyldandy.
— Shekteýler Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksiniń 38-baby 1-tarmaǵynyń 15) tarmaqshasyna sáıkes alynyp tastaldy, — delingen komıtet habarlamasynda.
Ónimder tizbesine mynalar engizildi:
- «Apamnyń sháıi Premium gold»;
- «Orda Kenııa»;
- «Al-Kaırat sháıi Premium gold».
Osydan buryn Qazaqstanda eń qymbat jáne arzan shaı qaı óńirde ekenin saralap kórgen edik.
