Qazaqstanda birqatar iri jobany júzege asyrýǵa 20 mlrd AQSh dollary tartylady
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń Úkimeti men Qatar Memleketiniń Úkimeti arasyndaǵy basym salalardaǵy jobalardy damytý úshin uzaqmerzimdi strategııalyq áriptestik ornatý týraly kelisimdi ratıfıkatsııalaý týraly» Zańy maquldandy.
«Kelisim elimizdiń aýmaǵyndaǵy telekommýnıkatsııa, energetıka, munaı-hımııa, kólik, qarjy jáne basqa da salalarda 9 birlesken naqty ınvestıtsııalyq jobany iske asyrýdy kózdeıdi. Atap aıtqanda, «Qashaǵan» ken ornyndaǵy gaz óńdeý zaýyttaryn, Qostanaı oblysyndaǵy kompressorlyq stantsııa men magıstraldyq gaz qubyryn, «Beıneý-Bozoı-Shymkent» magıstraldyq gaz qubyrynyń ekinshi jelisin, Ertis ózenindegi sý elektr stantsııasyn, Qyzylorda oblysyndaǵy elektr stantsııasyn salý jónindegi jobalar, sondaı-aq, «Bereke Bank» aktsıonerlik qoǵamynyń 100% aktsııasyn jáne «Mobaıl Telekom-Servıs» jaýapkershiligi shekteýli seriktestiginiń 100% qatysý úlesin satyp alý boıynsha jobalar qamtylǵan. Kelisimde Qazaqstan Respýblıkasy Úkimetiniń birqatar mindettemeleri kózdelgenin atap ótkenim jón. Máselen, Úkimet Kelisimniń sharttaryn ózgerte, kedergi keltiretin jáne joıa alatyn zańnamalyq aktilerdi qabyldaı almaıdy», - dedi senator Bıbigúl Aqqojına.
Buǵan qosa, Qazaqstan Úkimeti strategııalyq ınvestıtsııalyq jobalardy iske asyrý barysynda qoldanystaǵy ulttyq zańnamaǵa ózgerister engizýdi talap etý múmkindigimen kelisedi jáne memlekettik múddelerdi eskere otyryp, tıisti túzetýlerdi iske asyrý úshin barlyq qajet sharalardy qabyldaıdy.
«Qatar Memleketiniń Úkimeti ınvestıtsııalyq jobalardy iske asyrý maqsatynda damý ınstıtýttarynan nemese basqa da qatarlyq ınvestorlardan ınvestıtsııalar jáne qarjat tartý úshin jobalarǵa keshendi tekserý júrgizilip bolǵan soń, kómek kórsete alady. Sonymen qatar, qyzyǵýshylyq tanytqan ınvestıtsııalyq jobalar talaptarǵa saı bolýy jáne belgili bir kiristilik deńgeıine jetýi qajet. Kelisim aıasynda Qazaqstan strategııalyq ınvestıtsııalyq jobalardy iske asyrýǵa járdemdesý úshin jabdyqtardy, shıkizattar men materıaldardy ákelý kezinde kedendik bajdardy tóleý jónindegi mindettemelerden bosatý, sondaı-aq Qazaqstan zańnamasynda kózdelgen salyq jeńildikterin beretin bolady. Bul rette ınvestor osy Kelisim kúshine engen kúnnen keıin, qandaı da bir jańa salyqtardy tóleýge nemese Qazaqstan zańnamasynda engizilgen qandaı da bir basqa tólemderdi júzege asyrýǵa mindetti emes. Strategııalyq ınvestıtsııalyq jobalardy iske asyrý kezeńinde jáne odan keıingi 20 jyl ishinde Qazaqstan Respýblıkasynyń transferttik baǵa belgileý týraly zańnamasy ınvestorlarǵa qoldanylmaıtyny týraly atap ótken jón», - dedi senator.
Onyń sózine qaraǵanda, kelisimge sáıkes, qajet bolǵan jaǵdaıda taraptar strategııalyq ınvestıtsııalyq jobalarǵa qatysty jeke úkimetaralyq kelisim jasaı alady.
«Kelisimdi júzege asyrý jalpy somasy shamamen 20 mlrd AQSh dollaryn quraıtyn ınvestıtsııalardy tartýǵa múmkindik beredi dep eskerilgen», - dedi Bıbigúl Aqqojına.
