Qazaqstanda birqatar qalada aýanyń lastaný deńgeıi joǵary kúıde qalyp otyr - senator

ASTANA. KAZINFORM – Elimizde ekologııa salasynda ozyq tehnıkalarǵa kóshý protsesi bastalǵanymen, ony iske asyrý áreketi kóptegen júıelik kedergilerge tap bolyp otyr. Bul týraly senator Álı Bektaev málim etti.

- Qazaqstan Respýblıkasy ekologııalyq standarttar boıynsha halyqaralyq mindettemelerin oryndaýǵa, atap aıtqanda, parnıktik gazdar shyǵaryndylaryn qysqartýǵa jáne neǵurlym ornyqty tómen kómirtekti ekonomıkaǵa kóshýge yqpal etetin «Jasyl ekonomıka» modelin ilgeriletýdi qoldap, birqatar sharalar qabyldady. Solardyń ishinde, 2021 jyly QR Ekologııalyq kodeksi jańa redaktsııada qabyldanǵan bolatyn. Ekologııalyq kodeksinde iri kásiporyndarda eń ozyq tehnıkalardy engizý jáne jasyl ınvestıtsııalardy qoldaý tásilderi qarastyrylǵan. Kodekste bul normalardyń iske asyrylýyna kezeń-kezeńmen arnaıy ýaqyt ta berilgen. Qazir Qazaqstan Respýblıkasynda eń ozyq qoljetimdi tehnıkany engizýge mindetti І sanattaǵy 1500-ge jýyq kásiporyn bar. Máseleniń kúrdeliligi eskerile otyryp, protsess eki kezeńde ótýi kózdelgen: 2025 jyldan bastap 50 iri kásiporyn, al 2031 jyldan bastap I sanattaǵy basqa kásiporyndar ótýi mindettelgen, - dedi Á. Bektaev Senatta «Jasyl» ınvestıtsııalar tartý men Ekologııalyq kodeks normalarynyń iske asyrylýy taqyrybyndaǵy Úkimet saǵatynda.

Bul turǵyda senator kodeks normalary boıynsha, atalǵan ozyq tehnologııalardy engizgen jáne keshendi ekologııalyq ruqsat alǵan kásiporyndar tólemderden bosatylatynyn eske saldy. Al ýaqytyly engizbegen kásiporyndar úshin salyq tólemderiniń joǵarylaýy, ıaǵnı, ár úsh jyl saıyn salyqtyń - 2, 4 jáne 8 ese ulǵaıýy qarastyrylǵan.

- Ókinshke qaraı, elimizde ozyq tehnıkalarǵa kóshý protsesi bastalǵanymen, ony iske asyrý áreketi kóptegen júıelik kedergilerge tap bolyp otyr. Olardyń ishinde, qarjylyq, tehnologııalyq, logıstıkalyq, uıymdastyrýshylyq problemalar da bar. Qazir Almaty, Atyraý, Qaraǵandy, Temirtaý, Shymkent, Óskemen jáne Balqash qalalarynda atmosferalyq aýanyń lastaný deńgeıi joǵary kúıinde qalyp otyr. Aýanyń negizgi lastaýshylary - óńdeý ónerkásibi salalary, elektr energetıkasyn óndirý kásiporyndary, sondaı-aq taý-ken óndirý, qurylys, hımııa, munaı-gaz óńdeý kásiporyndary, - dedi depýtat.

Budan buryn habarlanǵandaı, kelesi jyly Qazaqstan óńirlik ekologııalyq sammıt ótkizedi.