Qazaqstanda birqatar dárilik zattardyń baǵasy tómendedi

ASTANA. KAZINFORM – Qazaqstannyń farmatsevtıkalyq naryǵynda memlekettik retteý júrgiziletin birqatar dárilik zattardyń baǵasy tómendedi, dep habarlaıdy Densaýlyq saqtaý mınıstrligi.

Baǵa tómendeýi jańartylǵan baǵa belgileý tetigin júzege asyrýmen baılanysty. Bul júıe dárilik preparattardyń qunyn qalyptastyrý úderisin barynsha ashyq jáne boljamdy etýge baǵyttalǵan.

Qazirgi ýaqytta dárilik zattardyń 4994 saýdalyq ataýyna shekti baǵalar bekitilgen. Al retseptsiz bosatylatyn 1707 preparat memlekettik retteýden shyǵarylyp, ýákiletti organ tarapynan turaqty túrde monıtorıng júrgizilip keledi.

2025 jyly Medıtsınalyq jáne farmatsevtıkalyq baqylaý komıteti elimizdiń 20 óńirinde dári-dármek baǵasyna monıtorıng júrgizdi. Zertteý vırýsqa, qabynýǵa, bakterııaǵa qarsy, júrek-qantamyr jáne asqazan-ishek aýrýlaryn emdeýge arnalǵan eń kóp suranysqa ıe 50 preparatty qamtydy.

- Qyrkúıek aıyndaǵy taldaý qorytyndysy boıynsha maýsymmen salystyrǵanda dárilerdiń 34%-ynyń baǵasy orta eseppen 7,8%-ǵa, al qazan aıynda 50%-ynyń baǵasy 11,1%-ǵa tómendegen.

Eń aıqyn tómendeý kelesi dárilerde baıqaldy: Gepar komp. Heel, Revmoksıkam, Tsefıaps, VALMAK-N, Zıtmak. Bul dárilik zattar halyq tutyný qurylymynda mańyzdy oryn alady jáne túrli aýrýlardy emdeý kezinde keńinen qoldanylady, - delingen aqparatta.

Medıtsınalyq jáne farmatsevtıkalyq baqylaý komıteti halyqty ádil baǵalarmen sapaly ári qaýipsiz dárilermen qamtamasyz etý maqsatynda naryqtaǵy úrdisterdi taldaýdy jáne júıeli monıtorıngti jalǵastyratynyn habarlady.

Sonymen qatar, dárilik zattardy ótkizý kezinde zańbuzýshylyq anyqtalǵan jaǵdaıda azamattar DariKZ jáne Naqty Onim mobıldi qosymshalary arqyly nemese komıtettiń óńirlik departamentterine júginý arqyly habar bere alady.

Aıta keteıik, 2026 jyldan bastap medıtsınalyq qyzmetter men dári-dármekter QQS-tan bosatylady.