Qazaqstanda biryńǵaı ýaqyt beldeýiniń adamdarǵa áseri zertteledi
ASTANA. KAZINFORM – Ǵylym jáne joǵary bilim mınıstri Saıasat Nurbek biryńǵaı ýaqyt beldeýiniń el halqyna áseri týraly zertteýge qatysty túsinik berdi.
Onyń aıtýynsha, osy máselege qatysty aldaǵy ýaqytta zertteý uıymdastyrylady. Bul turǵyda jetekshi ınstıtýttardy, sonyń ishinde geografııa ınstıtýtyn, sondaı-aq zertteýdiń fızıologııalyq jáne medıtsınalyq aspektilerimen aınalysatyn Densaýlyq saqtaý mınıstrliginiń ınstıtýttaryn tartý josparlanǵan.
«Joǵary ǵylymı-tehnıkalyq komıssııa jaqyn arada óziniń otyrysyn ótkizedi jáne onyń barysynda osy taqyryp qaralady. Eger bul bastamaǵa qoldaý jasalsa, onda birden konkýrs jarııalap, zertteýge kirisemiz», - dedi S. Nurbek Senatta tilshiler suraǵyna jaýap bere otyryp.
Eske sala keteıik, 1 naýryzdan bastap Qazaqstanda ýaqyt bir saǵat artqa jyljydy.
Osydan keıin ózgeriske qarsy shyqqan qazaqstandyqtar buryn qoldanysta bolǵan ýaqyt beldeýin qaıtarý jónindegi petıtsııa jarııalady.
Bıyl qyrkúıek aıynda Shyǵys Qazaqstan oblysynyń ákimi Ermek Kósherbaev jańa ýaqyt beldeýiniń oblys turǵyndarynyń turmysyna qalaı áser etkeni týraly pikir bildirdi.
