Qazaqstanda biryńǵaı qarjy ombýdsmeni ofısi qurylady
ASTANA. KAZINFORM — Qarjylyq qyzmetterdi, tutynýshylardyń quqyqtaryn qorǵaýdy kúsheıtý maqsatynda is-qımyldy qadaǵalaý modeline kóshý jáne qarjylyq ombýdsmeniniń biryńǵaı ofısin qurý josparlanyp otyr, dep habarlaıdy Qarjy naryǵyn retteý jáne damytý agenttigi.
Bul týraly «Qazaqstan Respýblıkasyndaǵy bankter jáne bank qyzmeti týraly» jáne «Qazaqstan Respýblıkasynyń keıbir zańnamalyq aktilerine qarjy naryǵyn retteý jáne damytý máseleleri boıynsha ózgerister men tolyqtyrýlar engizý týraly» zań jobalaryn Parlament Májilisinde tanystyrý barysynda Qarjy naryǵyn retteý jáne damytý agenttiginiń Tóraǵasy Mádına Ábilqasymova habarlady. Zań jobalary Memleket basshysynyń 2024 jáne 2025 jyldardaǵy Joldaýlaryn iske asyrý maqsatynda ázirlendi.
— Zań jobasy aıasynda tutynýshylarǵa qarjylyq qyzmetterdi kórsetý protsesin jańa qadaǵalaý saıasatyn, ıaǵnı is-qımyldy qadaǵalaý modelin engizý kózdelgen. Qarjylyq turaqtylyqty qamtamasyz etetin prýdentsııalyq qadaǵalaýdan aıyrmashylyǵy, jańa is-qımyldy qadaǵalaý modeli qarjylyq qyzmetterdi tutynýshylardyń táýekelderin tómendetýge baǵyttalǵan. Jańa qadaǵalaý modeliniń maqsattary tutynýshylardyń quqyqtaryn qorǵaýdy, adal básekelestikti damytýdy jáne daýlardy sotqa deıin retteýdiń tıimdi tetikterin qurýdy, sondaı-aq jarııa etilgen aqparattyń tolyqtyǵy men durystyǵyn baqylaýdy qamtıdy, — dep atap ótti Agenttik tóraǵasy.
Usynylǵan tásilder Ekonomıkalyq yntymaqtastyq jáne damý uıymynyń qarjylyq qyzmetterdi tutynýshylardyń quqyqtaryn qorǵaý jónindegi 12 qaǵıdattaryna negizdelgenin atap ótken jón. Atalǵan standarttar qarjy salasyndaǵy álemdik standarttardy belgileıtin Qarjylyq turaqtylyq jónindegi keńespen maquldanǵan.
Qaǵıdattar qarjylyq qyzmetterdi retteýdiń búkil aýqymyn, onyń ishinde normatıvtik bazany qalyptastyrýdy, tutynýshylarǵa ádil jáne teń qaraýdy, alaıaqtyqtan qorǵaýdy, derbes derekterdi qorǵaýdy jáne shaǵymdardy qaraýdyń tıimdi tetikterin qurýdy qamtıdy. Іs-qımyldy qadaǵalaýdy engizýdi qamtamasyz etý úshin Zań jobasynda qarjy ónimderin basqarýǵa, tolyq jáne shynaıy aqparatty jarııa etýge, josyqsyz praktıkalardy boldyrmaýǵa, sondaı-aq qarjy uıymdarynyń ýákiletti agentter men deldaldardyń qyzmeti úshin jaýapkershilikti qabyldaýǵa qoıylatyn talaptar belgilenedi.
— Zań jobasynda bank, saqtandyrý jáne mıkroqarjylyq qyzmetter boıynsha qarjy ombýdsmeniniń biryńǵaı ofısin qurý kózdelgen, bul azamattardyń joldanymdaryn qaraýdyń birkelkiligi men táýelsizdigin qamtamasyz etýge múmkindik beredi. Tutynýshylardyń quqyqtaryn tıimdi qorǵaý úshin daýlardy sotqa deıin retteýdiń úsh deńgeıli júıesi engiziledi. Máselen, qarjy uıymynda shaǵymdardy bastapqy qaraý, keıinnen qarjy ombýdsmanyna jáne júıelik buzýshylyqtar anyqtalǵan jaǵdaıda ýákiletti organdarǵa júginý kózdelgen», — dedi Ábilqasymova.
Bankter týraly jańa zań jobasynda tehnologııalyq ózgerister, ekonomıkany qarjylandyrýdaǵy bank sektorynyń rólin arttyrý, básekelestikti kúsheıtý jáne naryqqa jańa qatysýshylardy tartý, sondaı-aq qarjylyq-tehnologııalardy ilgeriletý jáne tsıfrlyq aktıvterdiń aınalymyn yryqtandyrý máseleleri eskeriledi.
Osyǵan deıin Mádına Ábilqasymova alaıaqtardyń tuzaǵyna túspeýdiń tásilin aıtty.