Qazaqstanda biryńǵaı 112 dıspetcherlik qyzmeti týraly erejege ózgerister engizildi
ASTANA. KAZINFORM — Halyqtyń qaýipsizdigin arttyrý maqsatynda kezekshi qyzmetterdiń jumysyn úılestirýdiń jańa erejeleri bekitildi, dep habarlaıdy QR Tótenshe jaǵdaılar mınıstrliginiń baspasóz qyzmeti.
— Tótenshe jaǵdaılar mınıstrligi Qazaqstan Respýblıkasynyń aýmaǵyndaǵy kezekshilik-dıspetcherlik qyzmetterdiń qyzmetin úılestirý qaǵıdalaryn jáne aýmaǵynda biryńǵaı kezekshi-dıspetcherlik «112» qyzmetiniń ókilettigin bekitip, ádilet organdarynda tirkedi. Bul qujat azamattyq qorǵaý júıesiniń tıimdiligin arttyrýǵa jáne halyqtyń qaýipsizdigin qamtamasyz etýge baǵyttalǵan. Jańa redaktsııa Qazaqstan Respýblıkasy Úkimetiniń 2020 jylǵy 23 qazandaǵy № 701 qaýlysymen bekitilgen Tótenshe jaǵdaılar mınıstrligi týraly erejeniń 16-tarmaǵynyń 69) tarmaqshasyna sáıkes ázirlendi, — delingen habarlamada.
Mınıstrlik atap ótkendeı, qujat BKDQ basqarmalaryn, ІІM polıtsııa kezekshi bólimshelerin, jedel medıtsınalyq járdem men sanıtarlyq avıatsııanyń dıspetcherlik qyzmetterdi, Ulttyq qaýipsizdik komıtetiniń qyzmetteri, áýe kemelerin izdestirý jáne qutqarý ortalyǵyn, kommýnaldyq apattyq qyzmetter men baılanys operatorlarynyń anyqtama qyzmetterin qosa alǵanda biryńǵaı kezekshilik jáne jedel qyzmetterdiń ózara is-qımyl tártibin belgileıdi.
Barlyq atalǵan qurylymdar tótenshe jaǵdaılarǵa, azamattardyń ómiri men densaýlyǵyna tónetin qaterlerge jedel den qoıý maqsatynda tyǵyz úılesimdilikpen jumys isteıdi. Bul aqparattyń jedel jetkizilýin, is-qımyldardyń kelisimdiligin jáne qajetti resýrstardyń 112 biryńǵaı nómiri arqyly baǵyttalýyn qamtamasyz etedi.
Tótenshe jaǵdaılar týyndaǵan kezde BKDQ basqarmalary ózara is-qımyl jasaıtyn barlyq qyzmetterdiń áreketterin úılestiredi. Osy maqsatta olar múddeli memlekettik organdardyń aqparattyq júıelerimen ıntegratsııalanǵan jáne óńirlerdegi qoldanystaǵy baılanys ınfraqurylymyn paıdalanady.
Ózara is-qımyl úsh negizgi rejımde uıymdastyrylǵan: kúndelikti qyzmet — daıyndyqty qamtamasyz etý jáne aqparat almasý; joǵary ázirlik rejımi — kúsheıtilgen monıtorıng pen resýrstardy ázirleý; tótenshe jaǵdaı rejımi — jedel den qoıý, basqarý jáne qajetti kúshter men quraldardy jiberý.
Engizilgen ózgerister Qazaqstan Respýblıkasynyń barlyq aýmaǵynda jedel den qoıý júıesiniń tıimdiligin jáne halyqtyń qaýipsizdigin arttyrýǵa baǵyttalǵan.
Budan buryn órt qaýipti maýsymda 4 244 adam ákimshilik jaýapkershilikke tartylǵanyn jazǵan edik.