Qazaqstanda brend ónimderdiń kóshirmelerin jarnamalaý men satýǵa shekteý engiziledi

ASTANA. KAZINFORM — 2024 jyly elimizde bóten taýar belgisin zańsyz paıdalanýdyń 300-ge jýyq deregi anyqtaldy. Bul týraly QR Ádilet mınıstri Erlan Sársembaev málim etti.

Búgin Parlament Májilisiniń jalpy otyrysynda depýtat Qaraqat Ábden naryqta belgili bir taýrlardyń kóshirmelerin saýdalaý órship turǵanyn aıtty.

- Áleýmettik jelilerde, kóbinese Instagram platformasynda brend ónimderdiń kóshirmeleri týraly jarnamalar tarap jatyr. Satýshylar óz jarnamalarynda ataqty brendterdiń atyn ashyq aıtyp, «resmı dúkenderden emes, bizden satyp alsańyz mıllıondaǵan qarajatty únemdeısiz» dep úgittep jatady. Sonymen qatar, kontrafaktilik ónimderdi satý derekteri tirkelgen. Saýda oryndarynda brend taýarlardyń kóshirmelerin jıi kórýge bolady... Bul salada baqylaýdy kúsheıtý qarastyrylǵan ba?, - dep surady depýtat.

Óz kezeginde mınıstr Erlan Sársembaev osyndaı ónimderdi jarnamalaý jáne bul ónimderdi avtorlyq quqyq ıesiniń kelisiminsiz satý zııatkerlik menshik quqyqtaryn buzý sanatyna jatatynyn eske saldy.

- Eger avtorlyq quqyq ıeleri shaǵymdansa, tıisti tekserýler jasalady. Ekinshiden, byltyr elimizde bóten taýar belgisin zańsyz paıdalanýdyń 300-ge jýyq deregi anyqtaldy. Sonymen qatar, marketpleıster men basqa ınternet-platformalarǵa toqtalsaq, osy júıede saýdalaýda tıisti máseleler bar. Qazirgi kezde múddeli memlekettik organdarmen birlesip, mundaı ónimderdi jarnamalaýǵa ári satýǵa shekteý engizýge qatysty jumystar atqarylyp jatyr, - dedi vedomstvo basshysy.

Bul shekteý avtorlyq quqyq ıeleriniń shaǵymynsyz iske asyrylatyn bolady.

Eske salsaq, byltyr Zara jáne OYSHO saýda belgileriniń ıesi ónimderin zańsyz paıdalanǵany úshin qazaqstandyq kásipkerdi sotqa berdi.

Budan buryn habarlanǵandaı, búgin Parlament Májilisiniń jalpy otyrysynda «QR keıbir zańnamalyq aktilerine zııatkerlik menshik máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.