Qazaqstanda biregeı jedel kómek jelisi engiziledi
ASTANA. KAZINFORM — Elimizde AQSh-taǵy 911 júıesi sııaqty biregeı jedel kómek jelisi engizilýi múmkin. Ol arqyly kómekke muqtaj kez kelgen adam bir ǵana nómirge qońyraý shalyp, ózine qajet barlyq qyzmetti shaqyra alady.
— Qazirgi tańda biz qazaqstandyq mamandar ázirlegen jańa aqparattyq júıeni engizdik. Ázirge 101 jáne 112 nómirleri biriktirildi. Endi 103 qyzmetin qosýdy josparlap otyrmyz. ıAǵnı, adam tótenshe jaǵdaı qyzmetine qońyraý shalǵanda ózine qajetti barlyq jedel qyzmetten kómek alady. Mysaly, jol-kólik oqıǵasy boldy delik. Kólik órtenip jatyr. Demek, onda órt sóndirýshiler men jedel járdem qyzmeti kerek. Buryn mundaı aqparatty qolmen berý ýaqyt alatyn. Endi birtutas dıspetcherlik qyzmet arqyly aqparat birden jiberiledi, bul bıýdjetti únemdeýge, halyqqa tıimdi qyzmet kórsetýge jaǵdaı jasaıdy, — deıdi IT-Space kompanııasynyń bas dırektory Nurjan Nurlybaev Kazinform tilshisine bergen suhbatynda.
Ázirge joba pılottyq rejımde júzege asyp jatyr.
— Qazirgi ýaqytta 101-112 qyzmetinde 10 operator jumys isteıdi, al 103 qosylǵan kezde operatorlar sany 35-ke deıin jetedi. Operatorlar da arnaıy oqytylady. 103 qyzmeti qosylǵanda dıspetcherlerge medıtsınalyq bilim berý josparlanǵan, sebebi kóp qońyraýlar medıtsınalyq baǵytta keledi, — deıdi maman.
Astanadaǵy 112 jedel jelisine táýligine 2000-ǵa deıin qońyraý túsedi. Onyń shamamen 30 paıyzy — naqty tótenshe jaǵdaılar boıynsha kómek suraýshylar.
— Qalǵan qońyraýlar boıynsha operatorlar azamattarǵa konsýltatsııalyq járdem beredi. Negizgi maqsat — adam faktoryn barynsha azaıtyp, jedel áreketti qamtamasyz etý. Osylaısha, elimizde AQSh-taǵy 911 tárizdi biregeı jedel kómek jelisi engiziledi, — deıdi Nurjan Nurlybaev.
IT-Space kompanııasynyń bas dırektory jańa júıe jedel qyzmetterdiń jumysyn aıtarlyqtaı jeńildetip, kómek kórsetý ýaqyty men dáldigin arttyrǵanyn aıtady. Pılottyq joba sátti nátıje kórsetse, bolashaqta elimizdiń ózge óńirlerine de engizilýi múmkin.
Aıta keteıik, budan buryn Qazaqstanda biryńǵaı 112 dıspetcherlik qyzmeti týraly erejege ózgerister engizilgenin jazǵanbyz.