Qazaqstanda brakonerlerdiń kólikteri tárkilenýi múmkin
ASTANA. QazAqparat - Qazaqstanda brakonerlerdiń kólikteri men qarý-jaraqtaryn tárkileýge múmkindik beretin zań jobasy ázirlenýde. Bul jaıynda Senat depýtattarynyń resmı saýalyna jaýap bergen burynǵy Premer-Mınıstr Baqytjan Saǵyntaev atap ótken, dep habarlaıdy QazAqparat tilshisi.
«Brakonerlik maqsatta paıdalanylǵan qarý-jaraqty, onyń ishinde avtokólik quraldaryn mindetti túrde tárkileýdi engizý máselesin, ony odan ary «Qazaqstan Respýblıkasynyń qylmystyq jáne qylmystyq is júrgizý zańnamasyn jetildirý máseleleri jónindegi keıbir zańnamalyq aktilerine ózgertýler men tolyqtyrýlar engizý týraly» zań jobasynyń aıasynda júzege asyrýdy ókiletti memlekettik organdar qarastyryp jatyr», - dep atap ótedi B.Saǵyntaev.
Onyń aıtýynsha, atalǵan zań jobasy Úkimettiń 2019 jylǵa arnalǵan zań shyǵarmashylyq jumystarynyń josparyna sáıkes bekitilgen tártippen osy jyldyń qyrkúıek aıynda Parlament Májilisiniń qaraýyna engiziletin bolady.
Esterińizge sala ketsek, 31 qańtarda ótken Parlament Senatynyń jalpy otyrysynda depýtat Muhtar Jumaǵazıev brakonerler kólikterin tárkilep, olardy tabıǵat qorǵaý ınspektorlaryna berýdi usynǵan bolatyn.
«Brakonerlik qylmys dalalyq jolda júrýge qolaıly ári júrdek kólikterdiń kómegimen júzege asyrylady. Zań talaptary boıynsha ol kólikter qylmys quraly bolyp esepteletindikten memleket paıdasyna tárkilenýi qajet. Alaıda, qorshaǵan ortaǵa, tabıǵat ıgiligine esepsiz shyǵyn keltirgen brakonerdiń basym kópshiligi jeńil jaza alýmen shektelip, kólik quraldary keıin qaıtarylyp beriledi. Eger olardy kólikterge ıelik quqyǵynan aıyryp, qylmysqa qatysty kólikter men basqa da quraldar eshqandaı ymyrasyz tárkilense, brakonerlerlik qylmysqa birden-bir tosqaýyl qoıylar edi», - dedi senator.
Osy oraıda, ol brakonerlik áreketterge qoldanylǵan kólikterdi sot sheshimi boıynsha memleket paıdasyna tárkilep, olardy janýarlar dúnıesin qorǵaıtyn organdar quzyryna ótkizýdi usyndy.
