Qazaqstanda bir jylda júrekke 13 myńnan astam ashyq operatsııa jasaldy
ASTANA.KAZINFORM - Qazaqstanda joǵary tehnologııalyq kardıologııalyq jáne kardıohırýrgııalyq kómekti damytý júıeli túrde jalǵasyp jatyr. Densaýlyq saqtaý mınıstrligi málimetinshe, 2025 jyldyń qorytyndysy boıynsha elimizde júrekke 13 106 ashyq operatsııa jasaldy. Bul 2024 jylmen salystyrǵanda 7,2% artyq.
Hırýrgııalyq aralasýlardyń basym bóligin aortokoronarlyq shýnttaý operatsııalary – 46,1%, júrektiń júre paıda bolǵan kemistikterine jasalǵan operatsııalar – 22,7%, júrektiń týa bitken kemistikterine jasalǵan operatsııalar 13,1% boldy.
Kardıohırýrgııanyń qarqyndy damýynyń nátıjesinde Qazaqstan osy saladaǵy jetistikteri boıynsha álemniń úzdik 30 eliniń qataryna endi.
Búginde elimizde júrekke ashyq operatsııa jasaý, endovaskýlıarlyq aralasýlar jáne joǵary tehnologııalyq medıtsınalyq kómektiń basqa da túrleri sátti oryndalyp jatyr. Qazir otandyq kardıologııada joǵary tehnologııalyq medıtsınalyq kómektiń 80-nen astam túri kórsetiledi.
Otandyq medıtsınanyń mańyzdy jetistikteriniń biri – 2025 jyly júrekti transplantattaýdyń 100-shi operatsııasynyń sátti jasalýy. Bul qazaqstandyq mamandardyń joǵary kásibı daıarlyǵyn jáne transplantologııa qyzmetiniń damýyn aıqyn kórsetedi.
Sońǵy bes jyldyń ishinde oń úrdis turaqty saqtalyp keledi. Osy kezeńde qanaınalym júıesi aýrýlarymen syrqattanýshylyq 15%-ǵa, al osy aýrýlardan bolatyn ólim-jitim 35,1%-ǵa tómendedi.
2026 jyldyń alǵashqy bes aıynyń qorytyndysy boıynsha da syrqattanýshylyqtyń tómendeý úrdisi jalǵasyp jatyr:
• qanaınalym júıesi aýrýlary – 6,6%-ǵa;
* arterııalyq gıpertenzııa – 9,7%-ǵa;
* júrektiń ıshemııalyq aýrýy – 10,1%-ǵa;
* jedel mıokard ınfarkti – 5,7%-ǵa;
* mıdyń qan aınalymynyń jedel buzylystary (ınsýltter) – 6,1%-ǵa tómendedi.
Qol jetkizilgen nátıjeler ınsýlttik jáne kardıologııalyq ortalyqtar jelisin damytý, joǵary tehnologııalyq medıtsınalyq kómektiń kólemin keńeıtý, zamanaýı klınıkalyq hattamalardy engizý, jedel medıtsınalyq járdem qyzmetin jetildirý, profılaktıkalyq tekserýler aýqymyn ulǵaıtý jáne júrek-qantamyr aýrýlaryna shaldyqqan patsıentterdi dárilik qamtamasyz etýdiń qoljetimdiligin arttyrýdyń arqasynda múmkin boldy.
Qyzylordada ashyq júrekke ota joǵary medıtsınalyq tehnologııa kómegimen jasalatynyn jazǵan edik.
