Elimizde bir jylda 43 myńnan astam adamnan qaterli isik anyqtaldy
ALMATY. KAZINFORM — 2025 jyly Qazaqstanda 43 myńnan astam jańa onkologııalyq naýqas tirkeldi.
Qazir el boıynsha qaterli isikpen ómir súrip jatqan adamdar sany 246 myńnan asty. Bul aldyńǵy jylmen salystyrǵanda 6,6% kóp. Bul týraly Dúnıejúzilik qaterli isikke qarsy kúres kúni qarsańynda ótken brıfıngte Qazaq onkologııa jáne radıologııa ǵylymı-zertteý ınstıtýty basqarma tóraǵasynyń orynbasary Aısha Moldasheva málimdedi.
Onyń aıtýyna qaraǵanda, naýqastar sanynyń ósýi eń áýeli aýrýdy erte anyqtaý kórsetkishteriniń jaqsarǵanymen baılanysty. 2025 jyly elimizde skrınıngtik baǵdarlamalar keńeıtilip, dıagnostıka sapasy artqan.
— Qazir aýrýdy anyqtaý deńgeıi ǵana ósip qana qoıǵan joq, bul — onkologııalyq aýrýlardy erte anyqtaýǵa baǵyttalǵan júıeli jumystyń da arqasy. Bul emdeýdi ýaqtyly bastaýǵa múmkindik berip, naýqastardyń uzaq ári sapaly ómir súrý múmkindigin edáýir arttyrady, — dedi Aısha Moldasheva.
Eske salaıyq, buǵan deıin Qazaqstandyqtarǵa kardıologııa men onkologııadaǵy terapııanyń jańa ádisteri qoljetimdi bolatynyn jazǵanbyz.