Qazaqstanda bir ýaqytta 4-5 jumysty qatar isteýge bolady

ASTANA. KAZINFORM — Qazaqstanda bir mezette birneshe jerde jumys isteýge tyıym salynbaǵan. Bul týraly zańger Jibek Joly arnasynyń «Búgin LIVE» baǵdarlamasynda aıtty.

— Eńbek kodeksine sáıkes, bir mezette birneshe jerde jumys isteýge bolady. Qosymsha jumys — bul negizgi jumystan tys ýaqytta eńbek sharty negizinde atqarylatyn qyzmet, — deıdi Baýyrjan Ábdimuratuly.

Onyń aıtýynsha, jumys ýaqytynyń da shegi bar.

— Negizgi jumys pen qosymsha jumys ýaqytynyń jıyntyǵy kúndelikti normadan 4 saǵat aspaýy tıis. Al jalpy kúndelikti norma — 8 saǵat. Demek, barlyǵy qosylyp, kúnine 12 saǵat qyzmet etýge bolady. Negizgi jumysty 8 saǵat isteý de shart emes. 2 saǵat, 3 saǵattan da atqara alasyz. Jalpy esepteı kele azamattardyń dál osylaı 4-5 jerde jumys isteýge múmkindigi bar, — deıdi maman.

Zańger negizgi jáne qosymsha jumysqa qatysty eńbek shartyn rásimdeý tártibin de túsindirdi.

— Eki jaǵdaıda da eńbek sharty jasalady. Tek onda qaısysy negizgi, qaısysy qosymsha ekeni naqty kórsetilýi tıis. Qosymsha jumysqa ornalasý úshin negizgi jumystan ruqsat alýdyń qajeti joq, biraq negizgi ornynan anyqtama talap etiledi, — deıdi Baýyrjan Ábdimuratuly.

Alaıda tolyq júktememen birneshe jerde qatar jumys isteýge tyıym salynǵan.

— Eger negizgi jumys 8 saǵattyq tolyq júktememen bolsa, qosymshaǵa tek 4 saǵat qana arnaýǵa bolady. Bul shekteý eń aldymen qyzmetkerdiń densaýlyǵyn qorǵaýǵa baǵyttalǵan. Ári jumys ónimdiligi azaıýy da múmkin, — deıdi ol.

Jalaqy, salyq jáne zeınetaqy jarnalary da zań boıynsha retteledi.

— Árbir jumys berýshi tıisti tólemderdi bólek jasaıdy. Sondyqtan birneshe jerden tabys tapsańyz da, árqaısysy zańǵa sáıkes ustalady, — deıdi zańger.

Alaıda qosymsha jumys isteı almaıtyn sanattar da bar.

— 18 jasqa tolmaǵandar, densaýlyǵyna zııandy jumystardy atqaratyndar, memlekettik jáne arnaıy quqyq qorǵaý organdarynyń qyzmetkerleri qosymsha jumys isteı almaıdy. Al basqa azamattarǵa esh shekteý joq, — dep túsindirdi Baýyrjan Ábdimuratuly.

Eńbek demalysyna da zańda naqty talap qoıylǵan.

— Qosymsha jumys ornyńyz negizgi jumystan beriletin demalys kezinde sizge de demalys berýge mindetti. Ol úshin qujatpen dáleldep, ótinish jazý jetkilikti, — deıdi zańger.

Eske sala keteıik, endi eńbek salasyndaǵy harassment jańa deńgeıde qaralady.